ដោយៈ ជេស៊ីកា
ភ្នំពេញៈ ក្រុមហ៊ុន Chestertons បានចាត់ទុកកម្ពុជាជាទីផ្សារ “
គន្លឹះ និងរីកចម្រើនខ្លាំង” ស្របតាមយុទ្ធសាស្រ្តពង្រីកខ្លួននៅតំបន់អាស៊ី។ វត្តមានក្រុមហ៊ុន ដែលមានអាយុកាលជាង២០០ឆ្នាំនេះ នឹងជួយលើកកម្ពស់ស្តង់ដារ ក្នុងការគ្រប់គ្រងអចលនទ្រព្យនៅកម្ពុជា និងបង្កើនទំនុកចិត្តដល់អ្នកវិនិយោគ។
នៅថ្ងៃទី១៣ ឧសភានេះ ក្រុមហ៊ុនផ្តល់សេវាកម្មគ្រប់គ្រងអចលនទ្រព្យលំដាប់ពិភពលោក Chestertons Cambodia ដែលមានប្រភពដើមពីចក្រភពអង់គ្លេស បានបើកសម្ពោធជាផ្លូវការនៅកម្ពុជា ដើម្បីឆ្លើយតបទៅនឹងកំណើនតម្រូវការ លើការគ្រប់គ្រងអគារលំនៅឋាន និងអគារពាណិជ្ជកម្ម។
ពិធីបើកសម្ពោធជាផ្លូវការរបស់ក្រុមហ៊ុន Chestertons Cambodia ត្រូវបានរៀបចំធ្វើឡើងនៅឯសណ្ឋាគារ Raffles Hotel Le Royal ដោយមានការអញ្ជើញចូមរួម ពីគណៈគ្រប់គ្រងក្រុមហ៊ុន Chestertons នៅកម្ពុជា និង ចក្រភពអង់គ្លេស ព្រមទាំងភ្ញៀវកិត្តិយសជាតិ និងអន្តរជាតិជាច្រើននាក់។
បច្ចុប្បន្នក្រុមហ៊ុន Chestertons មានអាយុកាល២១៦ឆ្នាំ ហើយ Chestertons បានបើកការិយាល័យជាផ្លូវការទី៣០របស់ខ្លួន នៅរាជធានីភ្នំពេញ។ ក្នុងនោះ ក្រុមហ៊ុន Chestertons Cambodia នឹងផ្ដោតសំខាន់លើ សេវាកម្មគ្រប់គ្រងអចលនទ្រព្យ ដូចជាអគារការិយាល័យ អគារលំនៅឋាន បុរី រួមទាំងអគារពាណិជ្ជកម្មផ្សេងៗទៀតនៅក្នុងប្រទេសកម្ពុជា។
ប្រធានក្រុមប្រឹក្សាភិបាលក្រុមហ៊ុន Chestertons Cambodia លោក កឺក ណារិន បានលើកឡើងថា ការរីកចម្រើនលើវិស័យសំណង់ និងវិស័យអចលនទ្រព្យ កំពុងរីកដុះដាលខ្លាំង ដូចជាសំណង់អគារសម្រាប់ការស្នាក់នៅ និងធុរកិច្ច ។ លោកកត់សម្គាល់ឃើញថា ការផ្តល់សេវាគ្រប់គ្រងអចលនទ្រព្យកន្លងមក ហាក់នៅមានចំណុចខ្វះខាតនៅឡើយ ដែលទាមទារឲ្យមានអ្នកជំនាញផ្នែកគ្រប់គ្រង ដើម្បីផ្តល់សេវាកម្មនេះប្រកបដោយប្រសិទ្ធិភាព។
លោកកឹក ណារិន បានថ្លែងថា “Chestertons Cambodia មានចក្ខុវិស័យវែងឆ្ងាយ សម្រាប់ដំណើរការក្រុមហ៊ុនរបស់យើង នៅក្នុងទីផ្សារប្រទេសកម្ពុជា តាមរយៈការចូលរួមចំណែក ដើម្បីផ្តល់សេវាកម្មគ្រប់គ្រប់អចលនទ្រព្យនេះ ជូនអ្នកអភិវឌ្ឍន៍អចលនទ្រព្យ អ្នកវិនិយោគ និងម្ចាស់អគារអោយបានល្អបំផុត”។
យោងតាមការបញ្ជាក់ពីអ្នកជំនាញអចលនទ្រព្យ ការទទួលបានសេវាគ្រប់គ្រងអចលនទ្រព្យ ដែលមានទាំងកេរ្តិ៍ឈ្មោះល្បីល្បាញ និងស្តង់ដារលំដាប់អន្តរជាតិ នឹងផ្តល់អត្ថប្រយោជន៍ជាច្រើនដល់ម្ចាស់ទ្រព្យ ជាពិសេសនោះ គឺជួយឱ្យតម្លៃអចលនទ្រព្យនោះឡើងថ្លៃខ្ពស់ ហើយងាយស្រួលលក់ចេញ ឬដាក់ជួល។
យោងតាមរបាយការណ៍ប្រចាំឆ្នាំ របស់ក្រសួងរៀបចំដែនដី នគរូបនីយកម្ម និងសំណង់បានបង្ហាញថា ក្នុងឆ្នាំ២០២១កន្លងទៅនេះ មានគម្រោងសាងសង់ជាង៤៣០០គម្រោង ទទួលបានការអនុម័ត ដែលមានផ្ទៃក្រឡាកម្រាលសំណង់សរុបជិត១៣លានម៉ែត្រការ៉េ។ គម្រោងសាងសង់ទាំងនេះ មានទុនវិនិយោគបូកបញ្ចូលគ្នាប្រមាណ៥,៣ ប៊ីលានដុល្លារ៕
