ដោយ៖ សុខុម
សិង្ហបុរី: តម្លៃប្រេងនៅតំបន់អាស៊ី បានហក់ឡើងនៅព្រឹកថ្ងៃពុធ ទី០១ ខែមិថុនានេះ បន្ទាប់ពីក្រុមមេដឹកនាំសហភាពអឺរ៉ុប បានព្រមព្រៀងហ៊ុមព័ទ្ធប្រេងរុស្ស៊ី ដោយផ្នែក និងជាដំណាក់កាល និងស្របពេលប្រទេសចិន បញ្ចប់ការបិទខ្ទប់ក្នុងក្រុងសៀងហៃ។
តម្លៃប្រេងឆៅនៅលើទីផ្សារអង់គ្លេស សម្រាប់ការចែកចាយក្នុងខែសីហា បានហក់ឡើ៧៨សេន ឬ ០,៧% ដល់១១៦,៣៨ដុល្លារអាមេរិក ក្នុងមួយបារ៉ែល។
កិច្ចសន្យាប្រេងសម្រាប់ការចែកចាយក្នុងខែកក្កដា បានផុតកំណត់កាលពីថ្ងៃអង្គារ ទី៣១ ខែឧសភា ជាមួយនឹងតម្លៃ១២២,៨៤ដុល្លារអាមេរិក ក្នុងមួយបារ៉ែល ដោយហក់ឡើងថ្លៃ១%។
ទន្ទឹមនេះប្រេងឆៅលើទីផ្សារសហរដ្ឋអាមេរិក បានហក់ឡើងថ្លៃ៦៣%សេន ឬ ០,៦% ដល់១១៥,៣០ដុល្លារអាមេរិក ក្នុងមួយបារ៉ែល។
ក្រុមមេដឹកនាំសហភាពអឺរ៉ុប បានព្រមព្រៀងគ្នាជាគោលការណ៍កាលពីថ្ងៃច័ន្ទ ទី៣០ ខែឧសភា ដើម្បីកាត់បន្ថយការនាំចូលប្រេង៩០% ពីប្រទេសរុស្ស៊ី ត្រឹមដំណាច់ឆ្នាំ២០២២ ដែលជាការដាក់ទណ្ឌកម្មដ៏ធ្ងន់ធ្ងរបំផុតរបស់ប្លុកនេះ មកលើរដ្ឋាភិបាលក្រុងមូស្គូ ចាប់តាំងពីរុស្ស៊ី បានបញ្ឆេះសង្គ្រាមចូលឈ្លានពានប្រទេសអ៊ុយក្រែន នៅថ្ងៃទី២៤ ខែកុម្ភៈ ដើមឆ្នាំនេះ៕
