ដោយ: គង់ លាងហួរ
អន្តរជាតិ: ម៉ាឡេស៊ីជាប់ចំណាត់ថ្នាក់ ក្នុងចំណោមដៃគូពាណិជ្ជកម្មកំពូលទាំង៣ ដែលសម្រេចបានទំហំពាណិជ្ជកម្មទ្វេរភាគីជាមួយប្រទេសចិន លើសពី១០០ពាន់លានដុល្លារនៅក្នុងឆមាសទីមួយ តាមរយៈគំនិតផ្តួចផ្តើមខ្សែក្រវ៉ាត់ និងផ្លូវ (BRI) ។
លោក Lin Shiguang ទីប្រឹក្សាអមស្ថានទូតចិន ប្រចាំទីក្រុងគូឡាឡាំពួរបានគូសបញ្ជាក់ថា “ក្នុងចំណោមប្រទេសចំនួន៦៣ ដែលបានរួមគ្នាកសាងគម្រោងBRI យើងសង្កេតឃើញថា មានប្រទេសចំនួន៣ សម្រេចបានទំហំពាណិជ្ជកម្មទ្វេរភាគីជាមួយប្រទេសចិន លើសពី១០០ពាន់លានដុល្លារអាមេរិក ”។
លោកបន្តថា “ក្នុងរយៈពេល៦ខែដើមឆ្នាំ២០២៤ ទំហំពាណិជ្ជកម្មទ្វេរភាគីរវាងចិន និងម៉ាឡេស៊ី បានឈានដល់ទំហំទឹកប្រាក់១០០,២៣ពាន់លានដុល្លារអាមេរិក កើនឡើង១០,៦ភាគរយ បើធៀបនឹងរយៈពេលដូចគ្នាកាលពីឆ្នាំមុន”។
លោក Lin អះអាងទៀតថា ប្រទេសចិន និងម៉ាឡេស៊ី គឺជាតំណាងដ៏សំខាន់ សម្រាប់បណ្តាប្រទេសកំពុងអភិវឌ្ឍន៍ និងប្រទេសដែលមានសេដ្ឋកិច្ច កំពុងរីកចម្រើននៅតំបន់អាស៊ី ដែលមានគំនិត និងគុណតម្លៃនៃការអភិវឌ្ឍន៍ស្រដៀងៗគ្នា ហើយយើងជាដៃគូ ដែលធ្វើដំណើររួមគ្នា នៅលើមាគ៌ាឆ្ពោះទៅរកការអភិវឌ្ឍ។
លោកជឿជាក់ថា មាគ៌ារបស់ចិនឆ្ពោះទៅកាន់ការធ្វើទំនើបភាវូបនីយកម្ម នឹងនាំមកនូវឱកាស ទំនុកចិត្ត និងលទ្ធផលឈ្នះ–ឈ្នះដល់ពិភពលោក។ ការអភិវឌ្ឍរួមគ្នា រវាងប្រទេសចិន និងម៉ាឡេស៊ី នឹងចាក់បញ្ចូលថាមពលវិជ្ជមាន បន្ថែមទៀតចូលទៅក្នុងតំបន់ និងសេដ្ឋកិច្ចពិភពលោក។
លោក Lin បានសង្កត់ធ្ងន់ថា “ក្នុងអំឡុងសម័យប្រជុំសមាជពេញអង្គលើកទី៣ របស់បក្សកុម្មុយនិស្តចិន កាលពីពេលថ្មីៗនេះ យើងបានកំណត់គោលដៅរួម ក្នុងការកែទម្រង់ឱ្យកាន់តែស៊ីជម្រៅបន្ថែមទៀត ដើម្បីបន្តធ្វើការកែលម្អ និងការអភិវឌ្ឍន៍ប្រព័ន្ធសង្គមនិយម ជាមួយនឹងចរិតលក្ខណៈបែបចិន និងជំរុញទំនើបភាវូបនីយកម្មលើប្រព័ន្ធ និងសមត្ថភាពអភិបាលកិច្ចជាតិ”៕ប្រភព: The edge Malaysia៕
