ដោយ: គង់ លាងហួរ
អន្តរជាតិ: ក្នុងចំណោមប្រជាជនជិត៨ពាន់លាននាក់នៅទូទាំងពិភពលោក ក្នុងនោះគេសង្កេតឃើញមានតែមនុស្សចំនួន២.៧៨១នាក់ប៉ុណ្ណោះបានជាប់ឈ្មោះជាមហាសេដ្ឋីមានប្រាក់ខ្ទង់ពាន់លានដុល្លារអាមេរិក។ នេះបើយោងតាមសារពត៌មាន MoneyControl។
ក្នុងចំណោមនោះ គេសង្កេតឃើញមានតែបុគ្គលល្បីៗចំនួន៣រូបប៉ុណ្ណោះ ដែលមានទ្រព្យសម្បត្តិចាប់ពី២០០ពាន់លានដុល្លារឡើងទៅ ដូចជាលោក Elon Musk នាយកប្រតិបត្តិក្រុមហ៊ុន Tesla លោក Jeff Bezos ស្ថាបនិកក្រុមហ៊ុន Amazon និងលោក Mark Zuckerberg នាយកប្រតិបត្តិក្រុមហ៊ុន Meta។
យោងតាមសន្ទស្សន៍មហាសេដ្ឋីរបស់សារពត៌មាន Bloomberg បង្ហាញថា លោក Elon Musk មានទ្រព្យសម្បត្តិចំនួន២៧០ពាន់លានដុល្លារ ខណៈលោក Bezos មានទ្រព្យសម្បត្តិចំនួន២១៥ពាន់លានដុល្លារ និងលោក Zuckerberg មានមានទ្រព្យសម្បត្តិចំនួន២០២ពាន់លានដុល្លារគិតត្រឹមថ្ងៃទី២៦ ខែកញ្ញា ឆ្នាំ២០២៤។
-->
តួលេខនេះបានធ្វើឱ្យលោក Mark Zuckerberg អាចនាំមុខនាយកប្រតិបត្តិក្រុមហ៊ុនបច្ចេកវិទ្យាធំៗផ្សេងទៀត រួមមានទាំងលោក Larry Ellison សហស្ថាបនិកក្រុមហ៊ុន Oracle ព្រមទាំងលោក Bill Gates និងលោក Steve Ballmer ដែលជាអតីតនាយកប្រតិបត្តិក្រុមហ៊ុន Microsoft ។
យោងតាមសារពត៌មាន Fortune រាយការណ៍ថា លោក Zuckerberg មិនត្រឹមតែបានជាប់ឈ្មោះជាមហាសេដ្ឋីមានទ្រព្យសម្បត្តិខ្ទង់២០០ពាន់លានដុល្លារកាលពីពេលថ្មីៗនេះប៉ុណ្ណោះទេ។ ប៉ុន្តែ លោកក៏ជាអ្នកឈ្នះដ៏ធំបំផុតក្នុងបញ្ជីមហាសេដ្ឋីពិភពលោកផងដែរ ខណៈនាយកប្រតិបត្តិក្រុមហ៊ុន Meta រូបនេះប្រមូលបានទ្រព្យសម្បត្តិរាប់សិបពាន់លានដុល្លារក្នុងឆ្នាំ២០២៤។
យោងតាមសន្ទស្សន៍មហាសេដ្ឋី Bloomberg បានឱ្យដឹងថាទ្រព្យសម្បត្តិរបស់បុរសវ័យ៤០ឆ្នាំរូបនេះបានកើនឡើងចំនួន៧១,៨ពាន់លានដុល្លារក្នុងឆ្នាំនេះ។ ទ្រព្យសម្បត្តិភាគច្រើនរបស់លោក Mark Zuckerberg មានប្រភពមកពីចំណែកភាគហ៊ុនរបស់លោកប្រហែល១៣ភាគរយនៅក្នុងក្រុមហ៊ុន Meta Platforms៕ប្រភព: MoneyControl៕
