ដោយ: គង់ លាងហួរ
អន្តរជាតិ: តម្លៃដីធ្លីនៅទីក្រុងហូជីម៉ិញ ប្រទេសវៀតណាម ត្រូវបានប្រកាសឱ្យដឹងជាផ្លូវការ។ ក្នុងនោះ ដីធ្លីនៅតាមដងផ្លូវទីប្រជុំជនមួយចំនួន មានតម្លៃចំនួន៦៨៧,២លានដុង(ប្រហែល២៧.០៤០ដុល្លារ)ក្នុងមួយម៉ែត្រការ៉េ។
ផ្ទុយទៅវិញ ដីធ្លីនៅតំបន់ជាយក្រុងហូជីម៉ិញ មានតម្លៃជាមធ្យមត្រឹមតែ២,៣លានដុងប៉ុណ្ណោះ (ប្រហែល៩០,៥០ដុល្លារ)ក្នុងមួយម៉ែត្រការ៉េ។ នេះបើយោងតាមការកំណត់ដោយគណៈកម្មាធិការប្រជាជននៃទីក្រុងហូជីមិញ។
យោងតាមតារាងតម្លៃដីផ្លូវការ ដែលចេញផ្សាយដោយគណៈកម្មាធិការប្រជាជន នៃទីក្រុងហូជីមិញបានបង្ហាញថា ដីស្ថិតនៅលើផ្លូវ Dong Khoi ផ្លូវ Le Loi និងផ្លូវ Nguyen Hue ក្នុងសង្កាត់លេខ១ មានតម្លៃថ្លៃជាងគេបំផុត ខណៈដែលដីនៅតំបន់លំនៅដ្ឋាន Thieng Lieng ក្នុងសង្កាត់ Can Gio មានតម្លៃថោកបំផុត។
តម្លៃដីទាំងអស់ខាងលើនេះ ជាប្រភេទដីលំនៅដ្ឋាន ហើយតម្លៃទាំងនេះ នឹងត្រូវបានប្រើប្រាស់ ដើម្បីគណនាសំណងដីធ្លី ពន្ធទាក់ទងនឹងដីធ្លី និងថ្លៃសេវាសម្រាប់នីតិវិធីរដ្ឋបាល។
ដោយឡែក នៅក្នុងករណីដែលប្រជាជនទិញ ឬលក់ដីធ្លីនៅក្រោមតម្លៃហាងឆេងថ្មីនេះ ពួកគេត្រូវឆ្លងកាត់ការត្រួតពិនិត្យដោយអាជ្ញាធរ ហើយអ្នកលក់ដីត្រូវបង់ពន្ធ និងថ្លៃសេវាដោយផ្អែកលើអត្រាតម្លៃដីធ្លីផ្លូវការ ដែលប្រកាសដោយគណៈកម្មាធិការប្រជាជននៃទីក្រុងហូជីមិញ។
ទីក្រុងហូជីម៉ិញ ក៏បានប្រកាសតម្លៃថ្មី សម្រាប់ដីកសិកម្ម និងដីនៅក្នុងសួនបច្ចេកវិទ្យា(Tech park)។ ដីកសិកម្មក្នុងមួយម៉ែត្រការ៉េ នឹងមានតម្លៃចន្លោះពី៤០០.០០០ ទៅ៨១០.០០០ដុង អាស្រ័យលើទីតាំង និងអាស្រ័យថា តើដីនោះត្រូវបានប្រើប្រាស់ដើម្បីដាំដំណាំស្រូវ ឬដំណាំមានអាយុកាលច្រើនឆ្នាំ។
ចំណែក តម្លៃដីនៅសួនបច្ចេកវិទ្យា សម្រាប់ប្រើប្រាស់នៅក្នុងវិស័យផលិតកម្ម នឹងកើនឡើង៧ដង ធៀបនឹងអត្រាពីមុនដល់ចំនួន១២,១៨លានដុង ក្នុងមួយម៉ែត្រការ៉េ និងកើនឡើង៨ដងដល់១៥,១២លានដុង ក្នុងមួយម៉ែត្រការ៉េចំពោះដីស្ថិតនៅលើផ្លូវ D1 និងផ្លូវ D2 ក្នុងសួនបច្ចេកវិទ្យាលំដាប់ខ្ពស់ នៅក្នុងសង្កាត់ Thu Duc ។
ជាមួយគ្នានេះ ដីធ្លីនៅក្នុងសួនបច្ចេកវិទ្យា សម្រាប់វិស័យពាណិជ្ជកម្ម និងសេវាកម្មនឹងកើនឡើង៩,១ដង ដល់ចំនួនជាង២១លានដុងក្នុងមួយម៉ែត្រការ៉េ។ នេះបើយោងតាមការដកស្រង់ដោយទីភ្នាក់ងារសារពត៌មាន Vnexpress។
រីឯ ដីប្រភេទពាណិជ្ជកម្ម និងដីដែលប្រើប្រាស់សម្រាប់វិស័យផលិតកម្ម ការអប់រំ និងការថែទាំសុខភាព នឹងមានតម្លៃចំនួន៨០ភាគរយ និងចំនួន៦០ភាគរយ នៃអត្រាតម្លៃដីលំនៅដ្ឋាន៕ប្រភព: Vnexpress៕
