ដោយ: គង់ លាងហួរ
អន្តរជាតិ: លោក Zhang Yiming ស្ថាបនិកក្រុមហ៊ុនបច្ចេកវិទ្យាយក្ស ByteDance ដែលជាម្ចាស់វេទិកាប្រព័ន្ធផ្សព្វផ្សាយសង្គម TikTok ក្លាយជាមហាសេដ្ឋីធំបំផុតរបស់ប្រទេសចិន។ លោកមានទ្រព្យសម្បត្តិផ្ទាល់ខ្លួន ចំនួន៤៩,៣ពាន់លានដុល្លារ។
លោកZhang មានវ័យ៤១ឆ្នាំ បានលាលែងចេញពីមុខតំណែងជានាយកប្រតិបត្តិក្រុមហ៊ុន ByteDance ក្នុងឆ្នាំ២០២១។
នៅពេលនេះ លោកបានក្លាយជាបុគ្គលទី១៨ ដែលបានជាប់ចំណាត់ថ្នាក់ជាមហាសេដ្ឋី មានជាងគេបំផុតរបស់ប្រទេសចិន គិតចាប់តាំងពីបញ្ជីរាយឈ្មោះមហាសេដ្ឋីចិន Hurun China ប្រចាំឆ្នាំត្រូវបានចេញផ្សាយ ជាលើកដំបូងក្នុងឆ្នាំ១៩៩៩។
លោក Zhang បានវ៉ាដាច់លោក Zhong Shanshan ដែលបានធ្លាក់មកចំណាត់ថ្នាក់លេខ២។ ទ្រព្យសម្បត្តិរបស់លោក Zhong មហាសេដ្ឋី ក្រុមហ៊ុនផលិតទឹកសុទ្ធ Nongfu បានធ្លាក់ចុះ២៤% មកនៅត្រឹម៤៧,៩ពាន់លានដុល្លារ។ នេះបើយោងតាមបញ្ជី Hurun ដែលបានចេញផ្សាយកាលពីថ្ងៃអង្គារម្សិលមិញ។
ទោះបីជាមានការតតាំងគ្នាតាមផ្លូវច្បាប់ ដើម្បីរក្សាវត្តមានរបស់វេទិកាប្រព័ន្ធផ្សព្វផ្សាយសង្គម TikTok នៅសហរដ្ឋអាមេរិកយ៉ាងណាក្តី ក៏ប្រាក់ចំណូលសកលរបស់ក្រុមហ៊ុន ByteDance បានកើនឡើង៣០% កាលពីឆ្នាំមុនដល់ចំនួន១១០ពាន់លានដុល្លារ។ ការណ៍នេះ បានជួយជំរុញកំណើនទ្រព្យសម្បត្តិផ្ទាល់ខ្លួនរបស់លោក Zhang។
រីឯតំណែងជាមហាសេដ្ឋីធំបំផុតទី៣ នៅក្នុងប្រទេសចិនបានទៅលើលោក Pony Ma ស្ថាបនិកក្រុមហ៊ុន Tencent ខណៈលោក Colin Huang ស្ថាបនិកក្រុមហ៊ុន PDD Holdings បានធ្លាក់មកនៅចំណាត់ថ្នាក់ទី៤។
យ៉ាងណាមិញ វេទិកាពាណិជ្ជកម្មអេឡិចត្រូនិកល្បីៗ ដែលផ្តោតលើការលក់ទំនិញ បញ្ចុះតម្លៃរបស់ក្រុមហ៊ុន PDD Holdings រួមមានវេទិកា Pinduoduo និងវេទិកា Temu នៅតែបន្តបង្ហាញពីកំណើននៃប្រាក់ចំណូល ប្រកបដោយសុខភាពល្អ។
ចំនួនមហាសេដ្ឋីចិន ដែលជាប់ឈ្មោះក្នុងបញ្ជី Hurun បានធ្លាក់ចុះ១៤២រូប មកនៅសល់ត្រឹមតែ៧៥៣រូបប៉ុណ្ណោះ។ តួលេខនេះ ក៏បានសរបញ្ជាក់ឱ្យឃើញផងដែរ ពីការធ្លាក់ចុះជាងមួយភាគបី បើធៀបនឹងកម្រិតកំពូល កាលពីឆ្នាំ២០២១៕ប្រភព: Reuters៕
