ដោយ: គង់ លាងហួរ
អន្តរជាតិ: កាលពីពេលថ្មីៗនេះ ក្រុមហ៊ុនបច្ចេកវិទ្យា China Mobile របស់ប្រទេសចិនបានប្រកាសថា ខ្លួនបានបាញ់បង្ហោះសាកល្បងផ្កាយរណប 6G ប្រកបដោយជោគជ័យ។
ក្រុមហ៊ុនចិន China Mobile បានគូសបញ្ជាក់ឱ្យដឹងថា ផ្កាយរណបនេះត្រូវបានចាត់ជាផ្កាយរណបអុីនធឺណេតកម្រិត 6G ដំបូងគេបង្អស់នៅទូទាំងពិភពលោក។
ប្រព័ន្ធផ្កាយរណបអុីនធឺណេតកម្រិត 6G មិនទាន់ត្រូវបានទទួលស្គាល់ និងកំណត់អំពីស្តង់ដាជាក់លាក់នៅឡើយទេ។ ប៉ុន្តែការស្រាវជ្រាវ និងការអភិវឌ្ឍន៍ បច្ចេកវិទ្យានាពេលអនាគតមួយនេះ កំពុងត្រូវបានធ្វើឡើងនៅជុំវិញពិភពលោក។
ប្រទេសចិនបានប្រកាសកំណត់យកឆ្នាំ២០៣០ ជាឆ្នាំ ដែលដាក់ឱ្យដំណើរការ ប្រព័ន្ធអុីនធឺណេត 6G សម្រាប់ការទំនាក់ទំនងគ្នា។ប្រទេសចិនរំពឹងថា ការកំណត់ស្តង់ដាររួមរបស់បច្ចេកវិទ្យា 6G នឹងអាចសម្រេចបានជោគជ័យនៅក្នុងឆ្នាំ២០២៥នេះ ដើម្បីបោះជំហានឈានទៅកាន់គោលដៅរបស់ខ្លួននៅក្នុងឆ្នាំ២០៣០។
ប្រទេសចិនបានក្លាយជាប្រទេស ដែលមានសមត្ថភាពខ្ពស់ក្នុងការអភិវឌ្ឍន៍បច្ចេកវិទ្យា 6G។ បណ្តាក្រុមហ៊ុនបច្ចេកវិទ្យាចិនធំៗដូចជាក្រុមហ៊ុនយក្ស Huawei ក្រុមហ៊ុន ZTE និងក្រុមហ៊ុនផ្សេងៗទៀត បានធ្វើការអភិវឌ្ឍន៍បច្ចេកវិទ្យាអុីនធឺណេត 6G ចាប់តាំងពីឆ្នាំ២០២០។
បច្ចេកវិទ្យា 6G ជាបច្ចេកវិទ្យាអុីនធឺណេត ដែលមានល្បឿនលឿនជាងបច្ចេកវិទ្យា 5G។ បច្ចេកវិទ្យា 6G នឹងផ្តល់ឱ្យអ្នកប្រើប្រាស់នូវការតភ្ជាប់ និងការផ្ទុកទិន្នន័យក្នុងល្បឿនកាន់តែលឿនជាងមុន។
ជាក់ស្ដែង បច្ចេកវិទ្យា 5G អាចផ្តល់ល្បឿនអុីនធឺណេតប្រហែល១០ជីហ្គាបៃក្នុងមួយវិនាទី (Gbps) ខណៈបច្ចេកវិទ្យា 6G អាចផ្តល់ល្បឿនអុឺនធឺណេតចាប់ពី១០០ជីហ្គាបៃក្នុងមួយវិនាទី៕ប្រភព: China Daily៕
