ដោយ: គង់ លាងហួរ
អន្តរជាតិ: ការលក់ផ្ទះនៅទូទាំងទីក្រុងធំៗទាំង៩របស់ប្រទេសឥណ្ឌាបានដាំក្បាលចុះចំនួន២៣ភាគរយនៅចន្លោះខែមករារហូតដល់ខែមីនា ឆ្នាំ២០២៥ ដោយសារតែផ្ទះមានតម្លៃខ្ពស់ពេក ដែលធ្វើឱ្យអ្នកទិញមានការប្រុងប្រយ័ត្ន។
យោងតាមរបាយការណ៍របស់ក្រុមហ៊ុនវិភាគទិន្នន័យអចលនទ្រព្យ PropEquity បានឱ្យដឹងថា បណ្តាអ្នកអភិវឌ្ឍន៍លក់ផ្ទះបានចំនួនត្រឹមតែ១០៥.៧៩១យូនីតក្នុងរយៈពេល៣ខែដំបូងកន្លងមកនេះ។
ការធ្លាក់ចុះនៃតម្រូវការបាននាំឱ្យចំនួនគម្រោងលំនៅដ្ឋានបើកដំណើរការលក់នៅទូទាំងទីក្រុងធំៗទាំង៩ របស់ប្រទេសឥណ្ឌា ដាំក្បាលចុះ៣៤ភាគរយ។
បណ្តាទីក្រុងធំៗទាំង៩នោះ រួមមាន ដូចជាតំបន់រដ្ឋធានីញូវដេលី ទីក្រុង Bengaluru ទីក្រុង Hyderabad ទីក្រុងបុមបៃ(Mumbai) ទីក្រុង Navi Mumbai ទីក្រុង Pune ទីក្រុង Chennai ទីក្រុង Thane និងទីក្រុង Kolkata។
លោក Samir Jasuja ស្ថាបនិកក្រុមហ៊ុន PropEquity បានមានប្រសាសន៍ឱ្យដឹងថា “ក្រៅពីតម្លៃផ្ទះខ្ពស់កប់ពពក និងសេដ្ឋកិច្ចធ្លាក់ចុះ បណ្តាអ្នកវិនិយោគជាច្រើនបានរក្សាការប្រុងប្រយ័ត្ន ដោយសារការព្រួយបារម្ភជុំវិញសង្រ្គាមពាណិជ្ជកម្មនៅលើពិភពលោក”។
ម្យ៉ាងវិញទៀត ការផ្គត់ផ្គង់លំនៅដ្ឋាននៅទូទាំងទីក្រុងទាំង៩ ខាងលើបានធ្លាក់ចុះមកនៅត្រឹមចំនួន៨០.៧៧៤យូនីតក្នុងត្រីមាសទី១ ឆ្នាំ២០២៥ បើធៀបនឹងការផ្គត់ផ្គង់លំនៅដ្ឋានចំនួន១២២.៣៦៥យូនីតក្នុងរយៈពេលដូចគ្នាកាលពីឆ្នាំមុន។
ផ្ទុយទៅវិញ ទីផ្សារអចលនទ្រព្យពាណិជ្ជកម្មរបស់ឥណ្ឌាបានបង្ហាញសញ្ញាវិជ្ជមាន បន្ទាប់ពីបណ្តាក្រុមហ៊ុននានាបានជួលការិយាល័យទំហំ៧៧,២លានហ្វីតការ៉េ(ប្រហែល៧.១៧២.១១៥ម៉ែត្រការ៉េ)នៅទូទាំងទីក្រុងធំៗចំនួន៧របស់ឥណ្ឌាកាលពីឆ្នាំមុន។
កាលពីសប្តាហ៍មុន ក្រុមហ៊ុនអចលនទ្រព្យរបស់ប្រធានាធិបតីអាមេរិកលោក ដូណាល់ ត្រាំ បានប្រកាសថា ខ្លួនគ្រោងសាងសង់អគារពាណិជ្ជកម្មដំបូងរបស់ខ្លួននៅក្នុងទីក្រុង Pune ភាគខាងលិចនៃប្រទេសឥណ្ឌា៕ប្រភព: Bloomberg៕
