ដោយ: គង់ លាងហួរ
អន្តរជាតិ: បណ្តាអ្នកវិនិយោគនានាកំពុងសម្រុកទិញផ្ទះ ដែលមានតម្លៃចាប់ពី៣០លានយ័ន(ប្រមាណ៤,២លានដុល្លារអាមេរិក)ក្នុងមួយយូនីតនៅក្នុងទីក្រុងសៀងហៃរបស់ប្រទេសចិន។នេះបើយោងតាមការគូសបញ្ជាក់ឱ្យដឹងពីក្រុមអ្នកសង្កេតការណ៍ទីផ្សារ។
បណ្តាអ្នកវិនិយោគទាំងនោះរំពឹងថា ផ្ទះដែលមានតម្លៃថ្លៃខ្ពស់កប់ពពកនៅទីក្រុងសៀងហៃ ដែលជាមជ្ឈមណ្ឌលពាណិជ្ជកម្ម និងហិរញ្ញវត្ថុរបស់ប្រទេសចិននឹងមិនដាំក្បាលចុះដូចទៅនឹងនិន្នាការលើទីផ្សារអចលនទ្រព្យទូទៅឡើយ។
កាលពីដើមខែមីនា ផ្ទះចំនួន១៥៨យូនីតស្ថិតនៅក្នុងគម្រោង Jinling Residence ដែលមានតម្លៃចន្លោះពី៤០លានយ័នដល់១៧០លានយ័នក្នុងមួយយូនីតត្រូវបានលក់ដាច់អស់គ្មានសល់ក្នុងរយៈពេលត្រឹមតែ២៤ម៉ោងប៉ុណ្ណោះ បន្ទាប់ពីប្រកាសបើកដាក់ឱ្យដំណើរការលក់។
-->
ក្រុមហ៊ុនអចលនទ្រព្យចុះបញ្ជីនៅលើផ្សារហ៊ុនទីក្រុងហុងកុង Kerry Properties ដែលជាអ្នកអភិវឌ្ឍន៍គម្រោងលំនៅដ្ឋានប្រណីត Jinling Residence បានទទួលប្រាក់ចំណូលចំនួន៩,២ពាន់លានយ័នពីការលក់ផ្ទះទាំង១៥៨យូនីតនេះ។
ប៉ុន្តែ ភាពរឹងមាំផ្នែកលំនៅដ្ឋានប្រណីតតែមួយមុខមិនមានប្រសិទ្ធភាពគ្រប់គ្រាន់ដើម្បីអូសទាញវិស័យអចលនទ្រព្យជារួមនៅក្នុងទីក្រុងសៀងហៃទាំងមូលឱ្យស្ទុះងើបឡើងវិញបាននោះទេ។
លោក Zhu Xinhai អ្នកគ្រប់គ្រងផ្នែកលក់នៅក្រុមហ៊ុន 5i5j Real Estate Brokerage បានអះអាងថា “ការសម្រុកទិញផ្ទះនៅក្នុងគម្រោងថ្មីរបស់ក្រុមហ៊ុន Kerry Properties ជាភស្តុតាងបង្ហាញថា ក្រុមអ្នកមាននៅតែបន្តចាប់ចិត្តចំពោះទីក្រុងសៀងហៃ”។
ប៉ុន្តែ លោកបានបញ្ជាក់បន្ថែមថា អ្នកទិញដែលមានកម្រិតប្រាក់ចំណូលមធ្យម និងប្រាក់ចំណូលទាបភាគច្រើននៅតែមានការប្រុងប្រយ័ត្នចំពោះទស្សនវិស័យទីផ្សារអចលនទ្រព្យ ទោះបីជាតម្រូវការលំនៅដ្ឋានមានសភាពរឹងមាំយ៉ាងណាក្តី៕ប្រភព: SCMP៕
ក្នុងមួយយូនីតនៅក្នុងទីក្រុងសៀងហៃរបស់ប្រទេសចិន។នេះបើយោងតាមការគូសបញ្ជាក់ឱ្យដឹងពីក្រុមអ្នកសង្កេតការណ៍ទីផ្សារ។){kind=link}