ដោយ: គង់ លាងហួរ
អន្តរជាតិ: តម្លៃអចលនទ្រព្យលំនៅដ្ឋាននៅក្នុងប្រទេសអូស្ត្រាលីបានហក់ឡើងដល់កម្រិតកំណត់ត្រាខ្ពស់បំផុតកាលពីខែមីនា ខណៈតម្លៃផ្ទះនៅទីក្រុងមួយចំនួនបានកើនឡើងក្នុងអត្រាមិនក្រោម១០ភាគរយបើធៀបនឹងរយៈពេលដូចគ្នាកាលពីឆ្នាំមុន។
តម្លៃលំនៅដ្ឋានជាមធ្យមនៅទូទាំងប្រទេសអូស្ត្រាលីបានកើនឡើង៣,៤ភាគរយដល់កម្រិតខ្ពស់បំផុតមិនធ្លាប់មានចំនួន៨២០.៣០០ដុល្លារអូស្ត្រាលី(ប្រមាណ៥១៧.១០០ដុល្លារអាមេរិក) គិតត្រឹមថ្ងៃទី៣១ ខែមីនា។នេះបើយោងតាមក្រុមហ៊ុនផ្តល់ទិន្នន័យ CoreLogic។
តម្លៃផ្ទះនៅទីក្រុង Perth បានកើនឡើងក្នុងអត្រាខ្ពស់ជាងគេបំផុតចំនួន១១,៩ភាគតយ តាមពីក្រោយដោយអត្រាកំណើនតម្លៃផ្ទះនៅទីក្រុង Adelaide ចំនួន១១ភាគរយ។
-->
ទីក្រុងស៊ីដនីជាទីផ្សារអចលនទ្រព្យ ដែលមានតម្លៃថ្លៃបំផុត ខណៈតម្លៃផ្ទះជាមធ្យមនៅទីក្រុងមួយនេះបានកើនឡើង០,៩ភាគរយដល់១,១៩លានដុល្លារអូស្ត្រាលីក្នុងមួយយូនីតបើធៀបនឹងរយៈពេលដូចគ្នាកាលពីឆ្នាំមុន។
លោក Tim Lawless នាយកផ្នែកស្រាវជ្រាវនៅក្រុមហ៊ុន CoreLogic បានវាយតម្លៃថា ការកើនឡើងនេះបណ្តាលមកពីជាការជំរុញទំនុកចិត្តក្នុងទីផ្សារ តាមរយៈការកាត់បន្ថយអត្រាការប្រាក់របស់ធនាគារកណ្តាលអូស្ត្រាលីកាលពីពាក់កណ្តាលខែកុម្ភៈ ជាលើកដំបូងក្នុងរយៈពេល៤ឆ្នាំ។
លោកស្រី Eleanor Creagh សេដ្ឋវិទូជាន់ខ្ពស់របស់ក្រុមហ៊ុនវេបសាយអចលនទ្រព្យ REA Group បានលើកឡើងថា “ការកាត់បន្ថយអត្រាការប្រាក់នៅខែកុម្ភៈបានបង្កើនសមត្ថភាពខ្ចីប្រាក់ និងជំរុញទំនុកចិត្តរបស់អ្នកទិញ ដោយជួយធ្វើឱ្យតម្រូវការផ្ទះកើនឡើង”។
ប៉ុន្តែ ទីផ្សារអចលនទ្រព្យអាចនឹងជួបប្រទះបញ្ហាប្រឈមនាពេលខាងមុខ ដោយសារ ការថយចុះនៃកំណើនប្រជាជន និងកង្វះលទ្ធភាពទិញលំនៅដ្ឋានក្នុងចំណោមប្រជាជនអូស្ត្រាលីជាច្រើន ដែលការណ៍នេះអាចធ្វើឱ្យតម្លៃផ្ទះធ្លាក់ចុះ៕ប្រភព: Vnexpress៕
