ដោយ: គង់ លាងហួរ
អន្តរជាតិ: តំបន់អាស៊ីសម្បូរទៅដោយគម្រោងអភិវឌ្ឍន៍ខ្នាតយក្សជាច្រើន ចាប់ពីទីក្រុងឆ្លាតវៃនាពេលអនាគត រហូតដល់ច្រករបៀងដឹកជញ្ជូនធំៗ។ គម្រោងទាំងនេះមានគោលបំណងជំរុញសេដ្ឋកិច្ច និងការតភ្ជាប់ហេដ្ឋារចនាសម្ព័ន្ធ។
ខាងក្រោមនេះជាគម្រោងអភិវឌ្ឍន៍ខ្នាតយក្សចំនួន៤ នៅតំបន់អាសុី ៖
ទី១: គម្រោងគំនិតផ្តួចផ្តើមខ្សែក្រវាត់ និងផ្លូវ (BRI) របស់ប្រទេសចិន
គម្រោងនេះត្រូវបានដឹកនាំដោយប្រទេសចិន ដោយលាតសន្ធឹងលើទ្វីបអាស៊ី ទ្វីបអឺរ៉ុប និងទ្វីបអាហ្វ្រិក។ គម្រោង BRI មានទំហំទុនវិនិយោគជាង១ទ្រីលានដុល្លារអាមេរិក។
គំនិតផ្តួចផ្តើមខ្សែក្រវាត់ និងផ្លូវជាយុទ្ធសាស្ត្រអភិវឌ្ឍន៍ហេដ្ឋារចនាសម្ព័ន្ធសកលដ៏ធំមួយ ដើម្បីបង្កើនទំហំដោះដូរពាណិជ្ជកម្ម និងការតភ្ជាប់រវាងប្រទេសចិន និងពិភពលោក តាមរយៈផ្លូវដែក កំពង់ផែ និងផ្លូវហាយវេ)។
ទី២: ច្រករបៀងឧស្សាហកម្ម Delhi-Mumbai (DMIC) របស់ប្រទេសឥណ្ឌា
គម្រោងច្រករបៀងឧស្សាហកម្ម Delhi-Mumbai របស់ប្រទេសឥណ្ឌា ដោយលាតសន្ធឹងចម្ងាយ១.៥០០គីឡូម៉ែត្រ តភ្ជាប់រវាងទីក្រុង Delhi និងទីក្រុងបុមបៃ(Mumbai)។
គម្រោងច្រករបៀងឧស្សាហកម្ម Delhi-Mumbai មានទុនវិនិយោគសរុបប្រហែល១០០ពាន់លានដុល្លារ។ គម្រោងនេះជាតំបន់ឧស្សាហកម្មដ៏ធំ រួមមាន ទីក្រុងឆ្លាតវៃ ច្រករបៀងដឹកជញ្ជូនពិសេស និងមជ្ឈមណ្ឌលដឹកជញ្ជូន។
ទី៣: គម្រោងផ្លូវដែកល្បឿនលឿន Chuo Shinkansen របស់ប្រទេសជប៉ុន
គម្រោងផ្លូវដែកល្បឿនលឿន Chuo Shinkansen តភ្ជាប់ពីទីក្រុងតូក្យូ ទៅកាន់ទីក្រុងណាហ្គោយ៉ា(Nagoya) ដែលមានទុនវិនិយោគសរុបចំនួន៨៤ពាន់លានដុល្លារ។
រថភ្លើងនឹងអាចរត់ក្នុងល្បឿន៥០០គីឡូម៉ែត្រក្នុងមួយម៉ោង។ បច្ចុប្បន្ន គម្រោងនេះកំពុងស្ថិតក្រោមការសាងសង់ ដោយគ្រោងបញ្ចប់រួចរាល់នៅឆ្នាំ២០៣៧ខាងមុខ។
ទី៤: គម្រោងទីក្រុង Forest City របស់ប្រទេសម៉ាឡេស៊ី
គម្រោងទីក្រុង Forest City មានទីតាំងនៅរដ្ឋ Johor របស់ប្រទេសម៉ាឡេស៊ី នៅជិតប្រទេសសិង្ហបុរី។ គម្រោងខ្នាតយក្សនេះមានទុនវិនិយោគសរុបជាង១០០ពាន់លានដុល្លារ។
គម្រោងទីក្រុង Forest City ជាទីក្រុងអេកូឆ្លាតវៃ ដែលត្រូវបានសាងសង់នៅលើដីជាប់មាត់សមុទ្រ រួមមានស្ថាបត្យកម្មបៃតង ដើម្បីទាក់ទាញជនបរទេស និងការវិនិយោគ៕ប្រភព: LinkedIn៕
