ដោយ: សហសេវិក
អន្តរជាតិ: ក្រុមហ៊ុនប្រឹក្សាអចលនទ្រព្យ Knight Frank វាយតម្លៃថា គោលនយោបាយពាណិជ្ជកម្មរបស់សហរដ្ឋអាមេរិកនឹងនៅតែបន្តមានភាពមិនប្រាកដប្រជានៅឆ្នាំ២០២៦នេះ។ ប៉ុន្តែ បណ្តាក្រុមហ៊ុននានានឹងសម្របខ្លួននឹងបញ្ហាប្រឈមរយៈពេលវែង។
ជំនួសឱ្យការពឹងផ្អែកលើដំណោះស្រាយរយៈពេលខ្លី ដូចជាដំណោះស្រាយពន្ធគយបណ្តោះអាសន្ន ក្រុមហ៊ុននានាកំពុងផ្តោតលើការផ្លាស់ប្តូរខ្សែសង្វាក់ផ្គត់ផ្គង់រយៈពេលវែង ដូចជាការធ្វើពិពិធកម្មប្រភពអ្នកផ្គត់ផ្គង់ និងការរក្សាស្តុកឱ្យបានច្រើន (Inventory)។
តម្រូវការអចលនទ្រព្យផ្នែកភស្តុភារក្នុងតំបន់អាសុីប៉ាសុីហ្វិកនឹងនៅតែមានភាពរឹងមាំ។ ក្រុមហ៊ុននានាក៏កំពុងងាកទៅរកក្រុមហ៊ុនផ្តល់សេវាដឹកជញ្ជូន (Third-party logistics) ឬ3PL ដើម្បីរក្សាភាពបត់បែន ខណៈខ្សែសង្វាក់ផ្គត់ផ្គង់កាន់តែមានភាពស្មុគស្មាញ។
-->
តម្រូវការអចលនទ្រព្យផ្នែកភស្តុភារនៅតំបន់អាស៊ាន និងឥណ្ឌា បាននាំមុខគេ ដែលជំរុញដោយការពង្រីកអាជីវកម្មរបស់ក្រុមហ៊ុនផលិតកម្ម ក្រុមហ៊ុនដឹកជញ្ជូន និងក្រុមហ៊ុនពាណិជ្ជកម្មអេឡិចត្រូនិក។
ភាពមិនប្រាកដប្រជាលើគោលនយោបាយពន្ធគយរបស់ទីក្រុងវ៉ាសុីនតោនបាននាំឱ្យក្រុមហ៊ុននានាអនុម័តយុទ្ធសាស្ត្រ “China+n” តាមរយៈការពង្រីកប្រតិបត្តិការអាជីវកម្មនៅទូទាំងប្រទេសផ្សេងៗគ្នានៅក្នុងតំបន់ ដើម្បីបញ្ចៀសហានិភ័យពន្ធគយ។
នៅក្នុងទីក្រុងហូជីមិញនៃប្រទេសវៀតណាម តម្លៃជួលអចលនទ្រព្យផ្នែកដឹកជញ្ជូនបានកើនឡើង២,៨ភាគរយ កាលពីឆមាសទី២ ឆ្នាំមុន ដោយសារការអភិវឌ្ឍឃ្លាំងថ្មី។
ដោយឡែក តម្លៃជួលអចលនទ្រព្យផ្នែកដឹកជញ្ជូននៅប្រទេសឥណ្ឌាបានកើនឡើង១,៥ភាគរយនៅឆមាសទី២ ឆ្នាំ២០២៥ ទោះបីជាឥណ្ឌាប្រឈមមុខនឹងពន្ធគយខ្ពស់លើការនាំចេញទំនិញទៅកាន់សហរដ្ឋអាមេរិកយ៉ាងណាក្តី។
តម្រូវការអចលនទ្រព្យផ្នែកភស្តុភារនៅទីក្រុងហ្សាការតារបស់ឥណ្ឌូនេសុីក៏មានការកើនឡើងផងដែរ ដោយសារក្រុមហ៊ុនផលិតកម្ម និងក្រុមហ៊ុនដឹកជញ្ជូនកុងតឺន័រនានាកំពុងពង្រីកខ្លួននៅក្នុងទ្វីបអាស៊ី៕ប្រភព: Edgeprop៕
