ដោយ: សហសេវិក
អន្តរជាតិ: យោងតាមក្រុមហ៊ុន Colliers បានឱ្យដឹងថា ទីផ្សារអចលនទ្រព្យនៅទូទាំងតំបន់អាស៊ីប៉ាស៊ីហ្វិកកំពុងឈានចូលដល់ដំណាក់កាលកំណើនថ្មីមួយ។ តួយ៉ាង អត្រាមូលធននីយកម្មនៅប្រទេសភាគច្រើនក្នុងតំបន់មានស្ថិរភាព ដែលការណ៍នេះបានជួយជំរុញទំនុកចិត្តរបស់វិនិយោគិន។
ក្រុមហ៊ុន Colliers អះអាងថា ស្ថិរភាពនៃអត្រាមូលធននីយកម្មកាលពីចុងឆ្នាំ២០២៥ បង្ហាញពីតុល្យភាពនៃទីផ្សារ ដែលមានភាពប្រសើរឡើងជាងមុន។
ការទាញទម្លាក់អត្រាការប្រាក់ និងមូលដ្ឋានគ្រឹះរឹងមាំនៅក្នុងទីផ្សារសំខាន់ៗ កំពុងលើកទឹកចិត្តវិនិយោគិនឱ្យងាកចេញពីការប្រុងប្រយ័ត្នទៅជាការត្រៀមខ្លួនវិនិយោគ ដែលការណ៍នេះនឹងជំរុញដល់ប្រតិបត្តិការទិញ-លក់អចលនទ្រព្យកាន់តែច្រើននៅឆ្នាំ២០២៦។
-->
ប្រទេសសិង្ហបុរីកំពុងបង្ហាញពីសន្ទុះវិជ្ជមាន ខណៈការបញ្ចុះអត្រាការប្រាក់បានធ្វើឱ្យប្រសើរឡើងនូវប្រាក់ចំណេញពីការវិនិយោគ ដែលពង្រឹងភាពទាក់ទាញចំពោះវិនិយោគិនបរទេសរយៈពេលវែង។
ដោយឡែក នៅប្រទេសអូស្ត្រាលី ទីផ្សារអចលនទ្រព្យលក់រាយនៅតែជាផ្នែក ដែលមានដំណើរការល្អបំផុត ខណៈការវិនិយោគផ្នែកអចលនទ្រព្យឧស្សាហកម្មកំពុងកើនឡើង ជាពិសេសនៅទីក្រុង Adelaide និងទីក្រុង Brisbane។
ប្រទេសឥណ្ឌាបានបង្ហាញសញ្ញាយ៉ាងរឹងមាំនៅលើផ្នែកការិយាល័យ លក់រាយ និងអចលនទ្រព្យឧស្សាហកម្ម ដោយសារតម្រូវការមានភាពរឹងមាំ និងការផ្គត់ផ្គង់មានតុល្យភាព។ ទីផ្សារអចលនទ្រព្យរបស់ប្រទេសនូវែលសេឡង់ក៏នៅតែមានស្ថេរភាពផងដែរ ដោយសារកម្រិតអត្រាការប្រាក់ទាប និងការវិនិយោគរបស់រដ្ឋាភិបាលលើហេដ្ឋារចនាសម្ព័ន្ធសំខាន់ៗ។
នៅប្រទេសកូរ៉េខាងត្បូង គេសង្កេតឃើញថា ទីផ្សារការិយាល័យនៅទីក្រុងសេអ៊ូលស្រូបទាញបានការវិនិយោគច្រើនជាងគេបំផុត បើធៀបនឹងផ្នែកផ្សេងទៀតនៃទីផ្សារអចលនទ្រព្យ។
ជាមួយគ្នានេះ តម្រូវការការិយាល័យនៅទីក្រុងហុងកុងកំពុងកើនឡើង ដោយសារតម្រូវការជួលពីបណ្តាក្រុមហ៊ុនចិនដីគោក ខណៈការងើបឡើងវិញនៃវិស័យទេសចរណ៍ក៏កំពុងជំរុញឱ្យតម្លៃជួលទីតាំងលក់រាយក្នុងទីក្រុងមួយនេះកើនឡើងផងដែរ៕ប្រភព: Edgeprop៕
