ដោយ: សហសេវិក
អន្តរជាតិ: អត្រាការិយាល័យទំនេរនៅទូទាំងប្រទេសសិង្ហបុរីបានធ្លាក់ចុះមកត្រឹម១០,៨ភាគរយគិតត្រឹមចុងត្រីមាសទីមួយនៃឆ្នាំ២០២៦ បើធៀបនឹង១១,១ភាគរយកាលពីចុងត្រីមាសទី៤ ឆ្នាំមមុន។
តួលេខចុងក្រោយបំផុតនេះក៏មានការធ្លាក់ចុះផងដែរ បើធៀបនឹងអត្រា១១,៧ភាគរយគិតត្រឹមចុងត្រីមាសទី១ ឆ្នាំ២០២៥។
តម្លៃជួលការិយាល័យកម្រិត A ក្នុងតំបន់ពាណិជ្ជកម្មកណ្តាល (CBD) របស់សិង្ហបុរីបានកើនឡើង ០,៨ភាគរយធៀបនឹងត្រីមាសមុន ដល់ ១២,៤០ ដុល្លារសិង្ហបុរីក្នុងមួយ ហ្វីតការ៉េក្នុងមួយខែ ដែលជាកំណើនរយៈពេល៥ត្រីមាសជាប់ៗគ្នា។
ជាមួយគ្នានេះ អត្រាការិយាល័យទំនេរកម្រិត A ក្នុងតំបន់ពាណិជ្ជកម្មកណ្តាល (CBD) របស់សិង្ហបុរីបានធ្លាក់ចុះមកត្រឹម៣,៣ភាគរយក្នុងត្រីមាសទី១ ឆ្នាំ២០២៦ ដែលធ្លាក់ចុះពី៤,៥ភាគរយក្នុងត្រីមាសទី៤ ឆ្នាំមុន។
លោកស្រី Tricia Song ប្រធានផ្នែកស្រាវជ្រាវនៅក្រុមហ៊ុន CBRE Singapore អះអាងថា ការធ្លាក់ចុះនេះត្រូវបានជំរុញដោយកំណើននៃតម្រូវការការិយាល័យធំៗ និងមានគុណភាពខ្ពស់។ ក្រុមហ៊ុននានាក្នុងវិស័យហិរញ្ញវត្ថុ និងការគ្រប់គ្រងទ្រព្យសម្បត្តិ នៅតែបន្តនាំមុខគេក្នុងសកម្មភាពជួល។
យ៉ាងណាមិញ ស្របពេលអ្នកជួលងាកទៅរកជម្រើសអគារទំនើបៗ និងបំពាក់បរិក្ខារល្អៗជាងមុន ការជួលអគារការិយាល័យចាស់ៗកំពុងប្រឈមមុខនឹងការធ្លាក់ចុះ។
ក្រុមហ៊ុនប្រឹក្សាអចលនទ្រព្យ Colliers លើកឡើងថា ម្ចាស់អគារការិយាល័យចាស់ៗត្រូវធ្វើឱ្យប្រសើរឡើងនូវផលបត្រអចលនទ្រព្យរបស់ពួកគេ ដើម្បីរក្សាការប្រកួតប្រជែង ខណៈអ្នកជួលកាន់តែឱ្យតម្លៃទៅលើប្រសិទ្ធភាព ស្តង់ដារបរិស្ថាន និងគុណភាពខាងក្នុងអគារ៕ប្រភព: Edgeprop៕
