ដោយៈ ចំណាន
ភ្នំពេញៈ ក្រុមមន្រ្តីជាន់ខ្ពស់បានបើកកិច្ចប្រជុំ “ក្រុមប្រឹក្សាជាតិភស្តុភារកម្ម លើកទី១១” ក្រោមអធិបតីភាពដ៏ខ្ពង់ខ្ពស់ លោកស៊ុន ចាន់ថុល ឧបនាយកដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមប្រឹក្សាជាតិភស្តុភារកម្ម (ក.ជ.ភ)។
កិច្ចប្រជុំនេះ មានការអញ្ជើញចូលរួមពី លោកជំទាវ សន សុភាវត្តី អគ្គនាយក នៃអគ្គនាយកដ្ឋានភស្តុភារកម្ម ចូលរួមអម ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធាណការ និងដឹកជញ្ជូន អនុប្រធានប្រចាំការ ក.ជ.ភ និងជាប្រធាន គ.ជ.ភនិងក្រុមមន្រ្តីពាក់ព័ន្ធ។
កិច្ចប្រជុំនេះ ធ្វើឡើងក្នុងគោលបំណងសំខាន់ៗចំនួន២ ដើម្បីពិនិត្យវឌ្ឍនភាពការអនុវត្តការងារ លើការអភិវឌ្ឍវិស័យភស្តុភារកម្មនៅព្រះរាជាណាចក្រកម្ពុជា ដូចជា ១. វឌ្ឍនភាពសូចនាករប្រតិបត្តិការភស្តុភារកម្ម (LPI 2.0) និងប៉ាណូឡិកាភស្តុភារកម្ម (Logistics Dashboard) និង ២. វឌ្ឍនភាពនៃការរៀបចំសេចក្តីព្រាងច្បាប់ស្តីពីភស្តុភារកម្ម ដើម្បីដាក់ឆ្លងសេចក្ដីព្រាងច្បាប់យន្តការ ក្រុមប្រឹក្សាជាតិភស្តុភារកម្ម។
លោកឧបនាយកដ្ឋមន្ត្រី បានធ្វើការវាយតម្លៃខ្ពស់ដល់ការខិតខំប្រឹងប្រែង សម្រេចបានលទ្ធផលវឌ្ឍនភាពការងារខាងលើនេះ និងការចូលរួមយោបល់យ៉ាងផុលផុស ពីសំណាក់ឯកឧត្តម- លោកជំទាវក្រសួង ស្ថាប័ន ក្នុងការជំរុញ និងការអភិវឌ្ឍវិស័យភស្តុភារកម្មនៅកម្ពុជា សម្រាប់គាំទ្រដល់ការបម្រើពាណិជ្ជកម្មជាតិ និងអន្តរជាតិ និងទ្រទ្រង់ការអភិវឌ្ឍសេដ្ឋកិច្ចជាតិ ឱ្យកាន់តែប្រសើរឡើង៕
