ដោយ: សហសេវិក
អន្តរជាតិ: តម្លៃផ្ទះនៅប្រទេសនូវែលសេឡង់បានធ្លាក់ចុះដល់កម្រិតទាបបំផុតក្នុងរយៈពេលជាង៣ឆ្នាំនៅក្នុងខែសីហា និងជះផលប៉ះពាល់ដល់ទស្សនវិស័យនៃតម្រូវការក្នុងស្រុក ដែលជាកត្តាជំរុញការងើបឡើងវិញនៃសេដ្ឋកិច្ច។
ក្រុមហ៊ុនប្រឹក្សាយោបល់អចលនទ្រព្យ Cotality បានឱ្យដឹងថា សន្ទស្សន៍តម្លៃផ្ទះបានធ្លាក់ចុះ០,៤ភាគរយធៀបនឹងខែកក្កដា។ តម្លៃផ្ទះនាពេលបច្ចុប្បន្ន មានកម្រិតទាបជាងមុន១៨ភាគរយបើធៀបនឹងកម្រិតកំពូលនៅខែមករា ឆ្នាំ២០២២។
លទ្ធផលនេះបន្ថែមសម្ពាធទៅលើការចំណាយរបស់គ្រួសារដែលកំពុងជួបប្រទះនឹងការកើនឡើងនៃថ្លៃប្រេងឥន្ធនៈ និងការកើនឡើងនៃអត្រាគ្មានការងារធ្វើ ដែលបញ្ជាក់ថាការចំណាយរបស់អ្នកប្រើប្រាស់នឹងនៅតែមានកម្រិតទាប។
ធនាគារកណ្តាលនូវែលសេឡង់ (RBNZ) នៅសប្តាហ៍នេះបានដំឡើងអត្រាការប្រាក់សម្រាប់កិច្ចប្រជុំលើកទីពីរជាប់ៗគ្នា។ បច្ចុប្បន្ន ការនាំចេញ និងវិស័យទេសចរណ៍របស់ប្រទេសនេះកំពុងរីកចម្រើន ខណៈការប្រើប្រាស់ និងការវិនិយោគកំពុងដើរយឺត។
លោក Kelvin Davidson ប្រធានសេដ្ឋវិទូអចលនទ្រព្យនៅ Cotality បានមានប្រសាសន៍ថា “ទីផ្សារលំនៅឋានស្ថិតក្នុងភាពទ្រឹង ដែលនឹងអូសបន្លាយរហូតដល់ឆ្នាំក្រោយ”។ “ពុំមានសញ្ញានៃការធ្លាក់ចុះយ៉ាងខ្លាំងនោះទេ ប៉ុន្តែក៏មិនមានកាតាលីករសម្រាប់កំណើនដ៏រឹងមាំនៅក្នុងរយៈពេលដ៏ខ្លីខាងមុខនេះដែរ”៕
