ដោយ:សហសេវិក
អន្តរជាតិ: របាយការណ៍មួយបានរកឃើញថា ប្រទេសវៀតណាមមានលំនៅឋានមានម៉ាកយីហោ (branded residence) ចំនួន ១៦.១៣៥ យូនីត នៅក្នុងគម្រោងចំនួន៦៨ ដែលជាចំនួនខ្ពស់បំផុតនៅក្នុងតំបន់អាស៊ីប៉ាស៊ីក និងខ្ពស់បំផុតលំដាប់ទី៣នៅលើពិភពលោក។
លើលើឆាកអន្តរជាតិ ប្រទេសវៀតណាមស្ថិតនៅពីក្រោយតែប្រទេសអេមីរ៉ាតអារ៉ាប់រួម (UAE)និងសហរដ្ឋអាមេរិកប៉ុណ្ណោះ ដែលមានលំនៅឋានម៉ាកយីយោចំនួន៨៤.៩៧២យូនីត និង៧១.៥៩២ យូនីតរៀងគ្នា។ នេះបើយោងតាមរបាយការណ៍ប្រចាំឆ្នាំ “The Brand Standard” របស់ក្រុមហ៊ុនប្រឹក្សាយោបល់ Global Branded Residences នៅអង់គ្លេស។
លំនៅឋានមានម៉ាកយីហោ (Branded residences) ជាលំនៅឋាន ដែលផ្សារភ្ជាប់ជាមួយម៉ាកយីហោដ៏ល្បីឈ្មោះមួយ ដោយម៉ាកយីហោនោះ អនុញ្ញាតឱ្យអ្នកអភិវឌ្ឍន៍គម្រោងអាចធ្វើទីផ្សារ និងលក់លំនៅឋានទាំងនោះក្រោមឈ្មោះយីហោរបស់ខ្លួន។
នៅក្នុងប្រទេសវៀតណាម ទីក្រុងហូជីមិញមានចំនួនលំនៅឋានបែបនេះច្រើនជាងគេ (៣.៥០៣យូនីត) បន្ទាប់មកទីក្រុងហាឡុង (២.៨៦០យូនីត) និងទីក្រុងដាណាង (១.៤២៩យូនីត)។
Accor ជាប្រតិបត្តិករឈានមុខគេ នៅក្នុងប្រទេសវៀតណាម ដោយមានលំនៅឋាន មានម៉ាកយីហោសរុបចំនួន៧.៨៥៤ នៅក្នុងគម្រោងចំនួន២៣។
ម៉ាកយីហោដែលស្ថិតក្រោមការគ្រប់គ្រង របស់ក្រុមហ៊ុននេះ រួមមាន Fairmont, Sofitel, Mercure និង Novotel។
លើសពីនេះ ទីផ្សារនេះក៏មានគម្រោងមួយចំនួន ដែលដំណើរការដោយម៉ាកយីហោកម្រិតខ្ពស់លំដាប់កំពូល ដូចជា Marriott និង The Ritz-Carlton ផងដែរ៕
