ដោយៈ ចំណាន
ភ្នំពេញៈ រដ្ឋលេខាធិការក្រសួងពាណិជ្ជកម្ម លោកវ៉ា រុតសាន បានអញ្ជើញដឹកនាំកិច្ចប្រជុំសម្របសម្រួលនីតិវិធី និងឯកសារក្នុងការនាំចេញផលិតផលកសិកម្មកម្ពុជានៅព្រំដែនកម្ពុជា-វៀតណាម។
កិច្ចប្រជុំនេះមានការចូលរួមពី តំណាងក្រសួងកសិកម្ម រុក្ខាប្រមាញ់ និងនេសាទ ថ្នាក់ដឹកនាំអគ្គនាយកដ្ឋាន និងនាយកដ្ឋានជំនាញនៃក្រសួងពាណិជ្ជកម្ម ព្រមទាំងតំណាងសហព័ន្ធដំឡូងមីកម្ពុជាជាច្រើនរូប។
កិច្ចប្រជុំនេះត្រូវបានរៀបចំឡើង ក្នុងគោលបំណងពិភាក្សាលម្អិតលើការសម្របសម្រួលនីតិវិធី និងឯកសារពាក់ព័ន្ធនានារបស់អ្នកនាំចេញ ព្រមទាំងធានាផលប្រយោជន៍ដល់ភាគីពាក់ព័ន្ធ ដើម្បីជំរុញ និងលើកកម្ពស់ប្រសិទ្ធភាព នៃការនាំចេញកសិផលកម្ពុជា ជាពិសេសផលិតផលដំឡូងមី ដោយផ្តោតសំខាន់លើការទិញ-លក់ដំឡូងមីក្រៀមទៅកាន់ប្រទេសវៀតណាម តាមបណ្តាច្រកព្រំដែនកម្ពុជា-វៀតណាម៕
