ដោយៈ រ៉ាណេត
ភ្នំពេញៈ នៅក្នុងការសាងសង់អគារធំៗ និងខ្ពស់ៗ សម្រាប់បម្រើប្រយោជន៍ជាមជ្ឈមណ្ឌលពាណិជ្ជកម្ម ឬអគារសម្រាប់ស្នាក់នៅសហកម្មសិទ្ធិ ក៏ដូចជាអគារអាផាតម៉ិន គឺតែងសាងសង់ចំណតសម្រាប់យានយន្តផ្សេងៗរបស់អតិថិជន ដែលចេញចូលបម្រើការងារ និងស្នាក់នៅក្នុងអគារ។
តើអ្នកវិនិយោគគួរសាងសង់ និងទុកទីធ្លាទំហំប៉ុនណា ដែលស័ក្ដិសមបំផុតទៅនឹងតួអគារទាំងមូល។
ឆ្លើយតបទៅនឹងប្រធានបទខាងលើនេះ លោកសាស្ត្រាចារ្យ ទួស សាភឿន អគ្គលេខាធិការរងគណៈកម្មកាស្ថាបត្យកកម្ពុជា-អាស៊ាន បានមានប្រសាសន៍ឲ្យដឹងនាព្រឹកថ្ងៃទី៦ មិថុនាកន្លងមកថា នៅក្នុងគម្រោងសាងសង់អគារនីមួយៗ គេតែងតែបានគិតទៅលើទីចំណតយានយន្ត ដែលជាចំណុចសំខាន់មួយ ក្នុងចំណោមចំណុចសំខាន់ជាច្រើនទៀតនៅក្នុងតួអគារ។
លោកបន្តទៀតថា “មិនថាចំពោះតែខុនដូ អាផាតមិន មជ្ឈមណ្ឌលពាណិជ្ជកម្ម ឬជាអគារសម្រាប់បម្រើវិស័យការិយាល័យនោះទេ ទីចំណតសម្រាប់យានយន្តគ្រប់គឺចាំបាច់បំផុតដែលត្រូវយកចិត្តទុកដាក់”។
;លោកសាស្រ្តាចារ្យបានបន្តទៀតថា ជាទូទៅទីចំណត គេតែងសាងសង់ប្រមាណជា៦០-៧០ភាគរយ ធៀបទៅនឹងចំនួនយូនីតសរុប ដោយមានច្រកចេញ-ចូលទូលាយងាយស្រួលបត់ និងមានសុវត្ថិភាពខ្ពស់។ លោកបន្តថា ជួនកាលគេអាចសាងសង់នៅជាន់ក្រោយដី ឬជាន់ផ្ទាល់ដីឡើងលើជាដើម ដែលវាអាស្រ័យទៅតាមគម្រោងប្លង់មេ។ ជាទូទៅសម្រាប់ទីចំណតរថយន្តមួយគ្រឿង គេត្រូវការទំហំចាប់ពី ៣០-៣៥ ម៉ែត្រការ៉េ ប៉ុន្តែបើផ្ទៃអគាររបស់អាផាតម៉ិន ឬអគារការិយាល័យ គេត្រូវគិតចន្លោះពី៤០-៥០ ម៉ែត្រការ៉េ។
នាយកទីផ្សារ និងផ្នែកលក់ខុនដូ FURI Residence ដែលមានទីតាំងនៅក្រុងព្រះសីហនុ លោក យី ភិរុណបានប្រាប់ឱ្យដឹងថា ចំពោះទីចំណតយានយន្តរបស់ខុនដូមួយនេះ ត្រូវបានសាងសង់ឡើងប្រកបដោយយកចិត្តទុកខ្ពស់ ដែលផ្តោតសំខាន់ទៅលើសុវត្ថិភាព និងភាពងាយស្រួលក្នុងទុកដាក់។ លោកបានបន្តទៀតថា ខុនដូ FURI Residence ត្រូវបានសាងសង់នៅលើផ្ទៃដីទំហំ៦០០០ម៉ែត្រការ៉េ មានចំនួន៥អគារ និងមានកម្ពស់រហូតដល់១៧ជាន់ ដោយត្រូវបែងចែកជាអគារកាស៊ីណូចំនួន២ អគាសណ្ឋាគារចំនួន១ និងអគារខុនដូចំនួន២។
លោកបានបន្តទៀតថា សម្រាប់ចំណតយានយន្តគឺមាន៣ជាន់ ធំទូលាយ និងមានទំហំប្រមាណ៦០-៦៥ ភាគរយនៃចំនួនយូនីតសរុប ដោយមានច្រកចេញ និងច្រកចូលផ្សេងគ្នា ដើម្បីបង្កភាពងាយស្រួលក្នុងចរាចរណ៍ មានប្រព័ន្ធការពារសុវត្ថិភាព សន្តិសុខយាម ២៤ម៉ោង ដោយអនុញ្ញាតក្នុងមួយយូនីតមានសិទ្ធិចនយានយន្តចំនួនមួយគ្រឿង។
មានប្រសាសន៍ស្រដៀងគ្នានេះដែរ លោកស្រី Grace Rachny Fong បានលើកឡើងថា រឿងចំណតយានយន្តជារឿងសំខាន់ ប៉ុន្តែវាត្រូវបានគេសាងសង់អាស្រ័យទៅតាមប្រភេទនៃអគារដែរ។
លោកស្រីបន្តទៀតថា “ទោះជាអាផាតមិនដូចគ្នា ក៏ត្រូវបានគេសង់ចំណតយានយន្តខុសគ្នាដែរ ដែលអាស្រ័យទៅតាមប្រភេទអគារ សម្រាប់អតិថិជនស្នាក់នៅក្នុងរយៈពេលយូរ ឬរយៈពេលខ្លី ជាក់ស្ដែងដូចជាអាផាតមិន ដែលមានភ្ញៀវបរទេសស្នាក់នៅក្នុងរយៈពេលខ្លី ភាគច្រើនមិនសូវមានយានយន្តនោះទេ”៕
