ដោយៈសុផារី
ភ្នំពេញៈ ក្រសួងសាធារណការ និងដឹកជញ្ជូន បាននិងកំពុងដំណើរការសាងសង់កំពង់ផែរណបចំនួន៧បន្ថែមទៀត ដើម្បីសម្រួលដល់ការដឹកជញ្ជូនទំនិញតាមផ្លូវទឹក នៅជុំវិញប្រទេសកម្ពុជា មកកាន់រាជធានីភ្នំពេញ និងសម្រាប់ការដឹកជញ្ជូន ក្នុងការនាំចេញទំនិញយុទ្ធសាស្ត្រ ទៅកាន់បរទេស។
នេះបើតាមការលើកឡើងរបស់លោកទេសរដ្ឋមន្ត្រី ស៊ុន ចាន់ថុល ក្នុងឱកាសចុះពិនិត្យវឌ្ឍនភាព គម្រោងអភិវឌ្ឍន៍ចំណតផែរណបពហុបំណង TS១១ របស់កំពង់ផែស្វយ័តភ្នំពេញ នៅថ្ងៃទី២៥ ខែមេសា ឆ្នាំ២០២២នេះ។
ផែរណបទាំង៧នោះ រួមមាន ចំណតផែរណបពហុបំណងកោះរកា (LM២៦) ចំណតផែនកុងតឺន័រ LM១៧ ចំណតផែរណបពហុបំណងព្រែកអញ្ចាញ (UM១) ចំណតផែរណបពហុបំណងទន្លេបិទ (UN២) ដែលគ្រោងបើកដំណើរការក្រោយពីនោះ៣ ទៅ៤ខែ។ ចំណតផែនរណបពហុបំណងឆ្លូង (ក្រចេះ) ចំណតផែរណបពហុបំណងកំពង់ឆ្នាំង និងចំណតផែរណបពហុបំណងព្រែកមាក់។
លោកស៊ុន ចាន់ថុល មានប្រសាសន៍ឱ្យដឹងថា “យើងមានផែនការសាងសង់កំពង់ផែរណបចំនួន៧ ដើម្បីឱ្យងាយស្រួលក្នុងការប្រមែប្រមូលទំនិញទូទាំងប្រទេសយើង ដើម្បីចូលមកកំពង់ផែភ្នំពេញ ហើយយកទៅលក់នៅបរទេស”៕
