ដោយៈ គង់ សូរិយា
ខេត្តកែបៈ ការវិនិយោគដោយទទួលខុសត្រូវសង្គម និងលើកកំពស់សក្តានុពលតំបន់ណាមួយ ពិតជាមានសារៈសំខាន់ណាស់ ដើម្បីជួយលើកកំពស់សេដ្ឋកិច្ច និងសង្គម។
គំរោងថ្មីមួយដែលបានបោះទុន៧លានដុល្លារ បាននិងកំពុងចូលរួមចំណែកអភិវឌ្ឍន៍ខេត្តកែប និងផ្តល់ទំនុកចិត្តដល់វវិនិយោគិនដទៃទៀត។
លោកCooler Tanអគ្គនាយកក្រុមហ៊ុនYoungsia Real Estateបានមានប្រសាសន៍ឲ្យដឹងកាលពីចុងសប្តាហ៍មុនថា ខេត្តកែបមានសក្តានុពលសម្រាប់ការរីកចម្រើនរយៈពេលវែង តាមរយៈគោលនយោបាយរបស់រាជរដ្ឋាភិបាល និងការដឹកនាំរបស់លោកបណ្ឌិតសោម ពិសិដ្ឋអភិបាលនៃគណៈអភិបាលខេត្តកែប ដែលបានធ្វើឲ្យខេត្តនេះមានការរីកចម្រើន និងផ្លាស់ប្តូរមុខមាត់យ៉ាងខ្លាំង។
លោកបន្តថា “ដោយមើលឃើញសក្តានុពលនេះ និងចូលរួមគាំទ្រដល់គោលនយោបាយរបស់រាជរដ្ឋាភិបាលផង ទើបលោកបោះទុនវិនិយោគនៅទីនេះ និងទទួលបានការគាំទ្រយ៉ាងខ្លាំង ពីអតិថិជននិងអាជ្ញាធរមូលដ្ឋាន”។ លោកបន្តថា “វិស័យឯកជនដើរតួនាទីសំខាន់ ក្នុងការអភិវឌ្ឍន៍មូលដ្ឋាន ហេតុនេះទើបយើងចូលរួមជាមួយរដ្ឋាភិបាល ដើម្បីអភិវឌ្ឍន៍នៅតាមមូលដ្ឋានដែលយើងទៅដល់”។
លោកCooler Tanបានបន្តថា គំរោងអភិវឌ្ឍន៍របស់យើងមិនមែនលក់ហើយបញ្ចប់នោះទេ គឺបើលក់គំរោងអស់ហើយដើរចេញមិនរាប់ថាទទួលបានជោគជ័យនោះទេ។ គំរោងដែលទទួលបានជោគជ័យ គឺគំរោង ដែលមានមនុស្សរស់នៅច្រើន មានការអភិវឌ្ឍន៍ដោយចីរភាព និងមានការអភិវឌ្ឍស្របតាមគោលនយោបាយរបស់រាជរដ្ឋាភិបាល។
គំរោងឆ្នេរសមុទ្រកោងកាង មានទំហំផ្ទៃដី១៥ហិកតា ដែលបាននិងកំពុងអភិវឌ្ឍន៍ប្រៀបដូចជារមណីយដ្ឋានមួយ ដោយក្រុមហ៊ុនបានចំណាយប្រាក់ប្រមាណ១លានដុល្លារ ដើម្បីកសាងហេដ្ឋារចនាសម្ព័ន្ឋនានា ដូចជាផ្លូវបេតុងប្រវែង១គីឡូម៉ែត្រ កសាងស្ពានដើរកំសាន្តតាមឆ្នេរសមុទ្រប្រវែង១គីឡូម៉ែត្រ ដាំដើមដូងប្រមាណ៥០០ដើម និងរៀបចំហេដ្ឋារចនាសម្ព័ន្ឋជាច្រើនទៀត៕
