ដោយ៖ សុផារី
ភ្នំពេញ៖ ការអភិវឌ្ឍអចលនទ្រព្យនៅកម្ពុជាមានការកើនឡើងគួរឱ្យកត់សម្គាល់ ក្នុងរយៈពេល១០ឆ្នាំចុងក្រោយនេះ ស្របពេលជាមួយនឹងកំណើនសេដ្ឋកិច្ចរបស់ប្រទេសកម្ពុជា។ តម្រូវការនៃការប្រើប្រាស់ដីធ្លីជំរុញឱ្យដីធ្លីនៅក្នុងតំបន់អភិវឌ្ឍន៍ជាច្រើនមានសន្ទុះខ្ពស់ តែដើម្បីជ្រើសរើសទីតាំងវិនិយោគប្រកបដោយភាពឆ្លាតវៃ អ្នកវិនិយោគត្រូវពិនិត្យមើលចំណុចមួយចំនួន។
លោកបណ្ឌិត អៀង សុធារ៉ា ប្រធានសមាគមពាណិជ្ជកម្ម និងវិនិយោគកម្ពុជា-ជប៉ុន (CJBI) បានមានប្រសាសន៍នៅក្នុងវេទិកាពិភាក្សាស្តីពីទិដ្ឋភាពច្បាប់ នៃការវិនិយោគអចលនទ្រព្យនៅកម្ពុជា កាលពីចុងសប្តាហ៍កន្លងមកថា “ការវិនិយោគលើអចលនទ្រព្យត្រូវចំណាយពេលយូរ ដើម្បីទទួលបានប្រាក់ចំណូលខ្ពស់”។
យោងតាមលោកបណ្ឌិត សុធារ៉ា ផែនការអភិវឌ្ឍន៍របស់រាជរដ្ឋាភិបាលជាផ្នែកមួយសំខាន់ ដែលនឹងជំរុញឱ្យមានកំណើនតម្លៃដីធ្លីនៅក្នុងតំបន់ណាមួយ តែកំណើនតម្លៃក៏កើនឡើងតាមវដ្តនៃកំណើនសេដ្ឋកិច្ចនៃប្រទេសផងដែរ ពោលគឺប្រសិនបើស្ថានភាពនៃសេដ្ឋកិច្ចមានភាពល្អប្រសើរឡើងវិញ នោះតម្លៃដីធ្លីក៏នឹងមានកំណើនខ្ពស់ឡើងវិញផងដែរ។
លោកបានបន្តថា “ដើម្បីទិញដី ឬផ្ទះ ដោយសង្ឃឹមថាតម្លៃនឹងឡើងថ្លៃ អ្នកវិនិយោគត្រូវពិនិត្យមើលកត្តាមួយចំនួន រួមទាំងផែនការអភិវឌ្ឍន៍ និងគោលនយោបាយរបស់រដ្ឋាភិបាលផងដែរ”។
លោកបណ្ឌិតបានបន្តទៀតថា “ការវិនិយោគទាំងអស់អាស្រ័យតាមវដ្តនៃការកើនឡើង ដែលតែងតែកើតឡើងរៀងរាល់១០ឆ្នាំម្តង។ ប្រសិនបើស្ថានភាពសេដ្ឋកិច្ចអាចនឹងមានភាពប្រសើរឡើងក្នុងរយៈពេល៣-៥ ឆ្នាំខាងមុខ នោះតម្លៃដីនឹងឡើងថ្លៃបន្តទៀត”៕
