ដោយ៖ សុផារី
ភ្នំពេញ៖ ការយល់ដឹងអំពីទិដ្ឋភាពច្បាប់នៃការវិនិយោគលើអចលនទ្រព្យគឺមានសារៈសំខាន់សម្រាប់អ្នកទិញអចលនៈទ្រព្យគ្រប់រូប ដើម្បីធានាថាការវិនិយោគមានផលចំណេញ និងសុវត្ថិភាព។
សម្រាប់ការសហការវិនិយោគរួមគ្នារវាងក្រុមហ៊ុនបរទេស និងក្រុមហ៊ុនក្នុងស្រុក ក្នុងការបង្កើតក្រុមហ៊ុនមួយនៅកម្ពុជា អ្នកជំនាញផ្នែកច្បាប់ផ្តល់យោបល់ថា ត្រូវពិនិត្យមើលទិដ្ឋភាពផ្នែកច្បាប់ឱ្យបានច្បាស់លាស់ជាមុនសិន ហើយត្រូវសិក្សាពីដៃគូសហការ ដើម្បីចៀសវៀងហានិភ័យក្នុងការវិនិយោគនាពេលអនាគត។
លោកស្រី ខៀវ មាលី មេធាវីផ្នែកកម្មសិទ្ធិបញ្ញា និងជាមេធាវីឈានមុខនៃក្នុងវិស័យសំណង់ និងអចលនទ្រព្យនៅក្នុងប្រទេសកម្ពុជា មានប្រសាសន៍នៅក្នុងវេទិកាពិភាក្សាស្តីពីទិដ្ឋភាពច្បាប់ នៃការវិនិយោគអចលនទ្រព្យនៅកម្ពុជា កាលពីចុងសប្តាហ៍កន្លងមកថា នៅក្នុងប្រទេសកម្ពុជា មានតែរូបវន្តបុគ្គល ឬនីតិបុគ្គលដែលមានសញ្ជាតិខ្មែរប៉ុណ្ណោះ ដែលមានសិទ្ធិកាន់កាប់ដីធ្លីបាន ដូច្នេះ ជនបរទេស សូម្បីតែរូបវន្តបុគ្គល និងនីតិបុគ្គល ក៏មិនមានកម្មសិទ្ធិដីធ្លីដែរ។
លោកស្រីបន្តថា “ក្នុងករណី ក្រុមហ៊ុនបុត្រសម្ព័ន្ធ នៅក្នុងប្រទេសកម្ពុជា ដែលបង្កើតឡើងជាក្រុមហ៊ុនបណ្តាក់ទុនរួមគ្នា រវាងវិនិយោគិនកម្ពុជា និងបរទេសអាចកាន់កាប់ដីធ្លីបាន។ តាមរយៈការបង្កើតក្រុមហ៊ុនបណ្តាក់ទុនរួមគ្នា អ្នកវិនិយោគបរទេសអាចវិនិយោគលើដីនេះដោយស្របច្បាប់។ ប៉ុន្តែពួកគេត្រូវតែកំណត់ឱ្យបានច្បាស់លាស់ នូវគោលបំណងនៃការវិនិយោគ និងទំនួលខុសត្រូវរបស់អ្នកវិនិយោគ ដើម្បីជៀសវាងការខ្វែងគំនិតគ្នានាពេលអនាគត។ ម្យ៉ាងទៀត ក្រុមហ៊ុនបណ្តាក់ទុនរួមគ្នាអាចទទួលបានធនធានបន្ថែម”។
លោកស្រីមេធាវីបានមានប្រសាសន៍ថា គោលដៅអាជីវកម្មមិនច្បាស់លាស់ អតុល្យភាពនៃកម្រិតជំនាញ ឬធនធាន និងវិធីសាស្រ្តគ្រប់គ្រងផ្សេងគ្នា របស់អ្នកវិនិយោគអាចបង្កើនហានិភ័យ សម្រាប់ក្រុមហ៊ុនបណ្តាក់ទុនរួមគ្នា។
លោកស្រីបន្តថា “នៅពេលវិនិយោគលើអចលនទ្រព្យ ដោយបង្កើតក្រុមហ៊ុននៅកម្ពុជា ដែលអាចកាន់កាប់ដីធ្លី ចំណុចសំខាន់ ដែលត្រូវពិចារណា គឺជ្រើសរើសដៃគូ ដែលមានសក្តានុពលបំផុត ដោយពិនិត្យមើលព័ត៌មានលម្អិតទាំងអស់រួមទាំងសាវតារ និងធនធាន”។
ចំណុចសំខាន់មួយទៀត នៅពេលពិភាក្សាអំពីការបណ្តាក់ទុនរួមគ្នា គឺត្រូវពិគ្រោះជាមួយដៃគូរបស់អ្នក ស្វែងរកដំបូន្មានពីអ្នកជំនាញ រួមទាំងអ្នកជំនាញផ្នែកច្បាប់ និងហិរញ្ញវត្ថុ និងកំណត់យ៉ាងច្បាស់នូវកាតព្វកិច្ចរបស់ភាគីនីមួយៗ ឃ្លាកម្មសិទ្ធិបញ្ញា និងវិធីសាស្ត្រដោះស្រាយវិវាទ៕
