ដោយ៖ សុផារី
ភ្នំពេញ៖ រាជរដ្ឋាភិបាលកម្ពុជាទើបតែបានសម្រេចបង្កើតក្រុង និងស្រុកថ្មីចំនួន៤បន្ថែមទៀតក្នុងខេត្តចំនួន៣ គឺខេត្តកំពង់ស្ពឺ កណ្តាល និងខេត្តក្រចេះ រួមមាន ក្រុងអរិយក្សត្រ ក្រុងសំពៅពូន ក្រុងឧដុង្គម៉ែជ័យ និងស្រុកសាមគ្គីមុនីជ័យ។ អ្នកជំនាញសេដ្ឋកិច្ច និងអចលនទ្រព្យសម្លឹងមើលឃើញថា ទីផ្សារអចលនទ្រព្យនៅក្នុងក្រុង និងស្រុកបង្កើតថ្មីនឹងទទួលបានការអភិវឌ្ឍនិងការរីកចម្រើនកាន់តែខ្លាំង។
លោក ច្រឹក សុខនីម អគ្គនាយកក្រុមហ៊ុន Century 21 Mekong បានមានប្រសាសន៍នៅថ្ងៃទី២៥ ខែធ្នូ ឆ្នាំ២០២២ថា ការរៀបចំបង្កើតក្រុងស្រុកថ្មីនេះជាការលើកកម្ពស់យន្តការនៃការអភិវឌ្ឍរបស់ក្រុងស្រុកបង្កើតថ្មី។ តាមផែនការ ការរៀបចំបង្កើត ឬរៀបចំផ្តល់ជា Brand Name (ឈ្មោះសម្គាល់) ក្នុងទីតាំងទាំងអស់នោះនឹងចាប់ផ្តើមមានការរីកចម្រើនឡើង ហើយយន្តការក្នុងការជួយដោយរាជរដ្ឋាភិបាលនឹងមានភាពល្អប្រសើរឡើងផងដែរ។
លោកបន្តថា “ប្រសិនបើអរិយក្សត្រត្រូវបានរៀបចំបង្កើតក្រុង ស្របពេលស្ពានកំពុងត្រូវបានរៀបចំកសាង ក្នុងពេលឆាប់ៗនេះ នោះតំបន់នេះនឹងមានការអភិវឌ្ឍបណ្តើរៗ”។
លោកអះអាងថា ទីផ្សារតំបន់អរិយក្សត្រនៅមានចំនួនប្រជាជននៅមានកម្រិតនៅឡើយ ហើយប្រសិនបើគោលនយោបាយរបស់រាជរដ្ឋាភិបាលកម្ពុជាបង្កើតក្រុងនឹងនាំលំហូរប្រជាសាស្រ្តមករស់នៅក្នុងតំបន់នេះបន្ថែម ហើយក៏ទាក់ទាញមកការបង្កើតទីលំនៅថ្មី និងការបង្កើតអាជីវកម្មថ្មីក៏មានចំនួនច្រើនផងដែរ។
លោកបញ្ជាក់ថា “នៅពេលមានលំហូរអាជីវកម្ម និងចំនួនអ្នកប្រើប្រាស់ ដូច្នេះតម្លៃដីធ្លីនិងអចលនទ្រព្យក៏នឹងឡើងបន្តិចម្តងៗផងដែរ”។
លោកបណ្ឌិត គី សេរីវឌ្ឍន៍ នាយកនៃមជ្ឈមណ្ឌលសិក្សាចិន និងជាអ្នកជំនាញសេដ្ឋកិច្ចនៃរាជបណ្ឌិតសភាកម្ពុជា បានមានប្រសាសន៍នៅថ្ងៃទី២៦ ខែធ្នូ ឆ្នាំ២០២២នេះថា ការបង្កើតក្រុង ដោយសារតែមានកំណើនប្រជាជន។ កាលណាមានការស្នាក់នៅ និងប្រជាជនច្រើន តំបន់នេះនឹងអាចក្លាយជាទីក្រុង ហើយការបង្កើតទីក្រុងនឹងធ្វើឱ្យមានការកើនឡើងមូលធន និងទ្រព្យសម្បត្តិរបស់ប្រជាពលរដ្ឋ ដែលជាចលករមួយជួយជំរុញកំណើនសេដ្ឋកិច្ច នៃប្រទេសជាតិ។
លោកបណ្ឌិតពន្យល់ ដោយលើកឡើងពីទ្រឹស្តីផលិតកម្ម នៃសេដ្ឋកិច្ចថា កាលណាមូលធនកើនឡើងកំណើន GDP នឹងកើនឡើងផងដែរ ហើយការកើនឡើងតម្លៃទ្រព្យសម្បត្តិនោះ ដីធ្លីនឹងមានការឡើងថ្លៃ និងមានការចាយវាយច្រើនជាងមុន ហើយក៏ជំរុញសកម្មភាពសេដ្ឋកិច្ចប្រសើរជាងមុនផងដែរ។
ក្រុងអរិយក្សត្រ ត្រូវបានបង្កើតដោយកាត់យកឃុំចំនួន៦ ពីស្រុកខ្សាច់កណ្តាល និងឃុំចំនួន ៥ ទៀតពីស្រុកល្វាឯម មានសង្កាត់ចំនួន១១ គឺសង្កាត់បាក់ដាវ សង្កាត់កោះឧកញ៉ាតី សង្កាត់ព្រែកអម្អិល សង្កាត់ព្រែកលួង សង្កាត់ព្រែកតាកូវ សង្កាត់ស្វាយជ្រំ សង្កាត់អរិយក្សត្រ សង្កាត់សារិកាកែវ សង្កាត់ពាមឧកញ៉ាអុង សង្កាត់ព្រែកក្មេង និងសង្កាត់បារុង។
ក្រុងសំពៅពូន នៃខេត្តកណ្ដាលត្រូវបានកាត់យក៥ឃុំពីស្រុកកោះធំរួមមាន សង្កាត់ឈើខ្មៅ សង្កាត់ព្រែកជ្រៃ សង្កាត់ព្រែកស្ពឺ សង្កាត់ជ្រោយតាកែវ និងសង្កាត់សំពៅពូន។ ចំណែក ស្រុកអូរគ្រៀងសែនជ័យ នៃខេត្តក្រចេះត្រូវបានកាត់យក៥ ឃុំពីស្រុកសំបូរ រួមមាន ឃុំក្បាលដំរី ឃុំអូរគ្រៀង ឃុំអូរកណ្ដៀរសែនជ័យ ឃុំរលួសមានជ័យ និងឃុំស្រែជិះ។ ដោយឡែក ស្រុកឧដុង្គជា២ គឺបំបែកទៅជាក្រុងឧដុង្គម៉ែជ័យ និងស្រុកសាមគ្គីមុនីជ័យនៃខេត្តកំពង់ស្ពឺ។ ក្នុងនោះក្រុងឧដុង្គម៉ែជ័យមានសង្កាត់៥ គឺសង្កាត់វាំងចាស់ វាលពង់ ត្រាចទង ព្រះសែ និងសង្កាត់ក្សេមក្សាន្ដ។ រីឯទីតាំងរដ្ឋបាលក្រុងឧដុង្គម៉ែជ័យត្រូវស្ថិតក្នុងសង្កាត់វាលពង់។ចំណែក ស្រុកសាមគ្គីមុនីជ័យ មានឃុំចំនួន ១០ គឺឃុំចាន់សែន ជើងរាស់ ជម្ពូព្រឹក្ស ក្រាំងចេក មានជ័យ ព្រៃក្រសាំង យុទ្ធសាមគ្គី ដំណាក់រាំង ពាំងល្វា និងឃុំភ្នំតូច៕
