ដោយ៖ វឌ្ឍនៈ
ភ្នំពេញ៖ សម្ដេចតេជោ ហ៊ុន សែន បានជំរុញ និងលើកទឹកចិត្តដល់អ្នកអភិវឌ្ឍន៍លំនៅឋាន នៅក្នុងប្រទេសកម្ពុជា ក្នុងការសាងសង់ផ្គត់ផ្គង់លំនៅឋានតម្លៃសមរម្យ សម្រាប់មន្ត្រីរាជការ និងអ្នកមានចំណូលទាប និងមធ្យម។
សម្ដេចតេជោ បានមានថ្លែងថា រាជរដ្ឋាភិបាលបានលើកទឹកចិត្ត ដល់អ្នកអភិវឌ្ឍន៍លំនៅឋានតម្លៃសមរម្យរួចមកហើយ។ ជាក់ស្ដែង ផ្ទះតម្លៃក្រោម៧ម៉ឺនដុល្លារមិនមានការយកពន្ធ លើការផ្ទេរកម្មសិទ្ធិនោះទេ ហើយតម្រូវការផ្ទះតម្លៃសមរម្យនេះក៏កំពុងមានកំណើន ស្របនឹងប្រជាពលរដ្ឋកើនឡើង និងមានតម្រូវការផ្ទះ សម្រាប់ស្នាក់នៅជាចាំបាច់។
សម្តេចតេជោបានបន្តថា “រហូតមកដល់ពេលនេះ មានក្រុមហ៊ុនមួយចំនួនបានអភិវឌ្ឍន៍លំនៅឋាន សម្រាប់ពលរដ្ឋដែលមានប្រាក់ចំណូលទាប និងមធ្យម ហើយក៏មានក្រុមហ៊ុនខ្លះទទួលបានជោគជ័យ ក្រុមហ៊ុនខ្លះទៀតមិនសូវទទួលបានការគាំទ្រ ពីប្រជាពលរដ្ឋនោះទេ ដោយសារកត្តាទីតាំង គុណភាព និងការតុបតែងផ្ទះនៅខាងក្នុង”។
របាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញក្នុងឆ្នាំ២០២២នេះ ការអភិវឌ្ឍលំនៅឋាននៅក្នុងប្រទេសកម្ពុជា នៅតែជាការអភិវឌ្ឍ ដែលមានគម្រោងច្រើនជាងគេ ធៀបនឹងគម្រោងសំណង់នានា ដែលបានបង្ហាញថា តម្រូវការលំនៅឋានក្នុងប្រទេសកម្ពុជា នៅតែបន្តមានពីសំណាក់ប្រជាពលរដ្ឋ។
អ្នកជំនាញនៃក្រុមហ៊ុនអចលនទ្រព្យជាច្រើន ក៏បានលើកឡើងផងដែរថា តម្រូវការលំនៅឋានក្នុងប្រទេសកម្ពុជានៅតែបន្តកើនឡើង ជាពិសេសលំនៅឋានតម្លៃសមរម្យ ដូច្នេះអ្នកអភិវឌ្ឍន៍គួរតែបន្តអភិវឌ្ឍន៍លំនៅឋានតម្លៃសមរម្យឱ្យបានច្រើនបន្ថែមទៀត៕
