ឌូបៃដាក់ចេញផែនការយុទ្ធសាស្ត្រដើម្បីក្លាយជាអ្នកឈានមុខគេក្នុងពិពលោកក្នុងវិស័យវិនិយោគអចលនទ្រព្យ

សុខុម

រីយ៉ាដ: មន្ទីរដែនដីក្រុងឌូបៃ (DLD) នៃប្រទេសអារ៉ាប់រួមអេមីរ៉ាត បានដាក់ចេញផែនការយុទ្ធសាស្រ្តដើម្បីជួយឱ្យក្រុងឌូបៃ ក្លាយជាអ្នកនាំមុខគេក្នុងពិភពលោកក្នុងវិស័យវិនិយោគអចលនទ្រព្យ។ នេះបើយោងតាមសារព័ត៌មាន Arab News ចុះផ្សាយកាលពីថ្ងៃពុធ ទី២៨ ខែធ្នូ។

យោងតាមរបាយការណ៍ ដែលចេញផ្សាយ ដោយទីភ្នាក់ងារព័ត៌មាន WAM ឱ្យដឹងថា បេសកកម្មដ៏ចម្បងនៃផែនការយុទ្ធសាស្រ្តនេះ គឺដើម្បីផ្តល់សេវាកម្មអចលនទ្រព្យយ៉ាងរលូននៅក្រុងឌូបៃ រួមជាមួយនឹងការអនុវត្តច្បាប់ប្រកបដោយប្រសិទ្ធភាព និងការផ្តល់ធនធានមនុស្សដ៏ចាំបាច់ ដើម្បីជួយជំរុញឱ្យវិស័យនេះរីកចម្រើន។

យុទ្ធសាស្រ្តដែលនឹងត្រូវអនុវត្តរហូតដល់ឆ្នាំ២០២៦ នេះក៏មានគោលបំណងបង្កើនការរួមចំណែកនៃវិស័យអចលនទ្រព្យ ដល់នឹងផលទុនជាតិសរុប (GDP) របស់ប្រទេសអារ៉ាប់រួមអេមីរ៉ាត ដែលនឹងដើរតួយ៉ាងសំខាន់ នៅក្នុងការជួយទីក្រុងឌូបៃ ឱ្យក្លាយជាសេដ្ឋកិច្ចអភិវឌ្ឍន៍បំផុតមួយក្នុងពិភពលោក។

ទីភ្នាក់ងារព័ត៌មាន WAM បានធ្វើការកត់សម្គាល់បន្ថែមទៀតថា យុទ្ធសាស្ត្រនេះគឺផ្អែកលើសសរស្តម្ភសំខាន់ៗចំនួន៥ដែលគេចាត់ទុកថាមានសារៈសំខាន់ សម្រាប់ការរីកចម្រើន នៃវិស័យអចលនទ្រព្យរបស់ក្រុងឌូបៃ។

សសរស្តម្ភទី១ គឺផ្តោតលើការបង្កើតគំរូ ឬ ម៉ូឌែលអចលនទ្រព្យដែលជួយធ្វើឱ្យប្រសើរឡើងនូវការត្រៀមខ្លួន និងនិរន្តរភាពនៃវិស័យនេះ រួមជាមួយការធានានូវអភិបាលកិច្ចប្រកប ដោយប្រសិទ្ធភាពក្នុងវិស័យនេះផងដែរ។

ក្រោមសសរស្តម្ភទី២ ក្រុងឌូបៃ មានគោលបំណងក្លាយជាអ្នកឈានមុខគេ ក្នុងវិស័យអចលនទ្រព្យ តាមរយៈការលើកកម្ពស់បរិយាកាសដ៏ទាក់ទាញជាសកល និងការបំពាក់បច្ចេកវិទ្យា ដើម្បីជំរុញការអភិវឌ្ឍដំណោះស្រាយអចលនទ្រព្យ។

សសរស្តម្ភទី៣ នៃយុទ្ធសាស្រ្តនេះ គឺផ្តោតលើវិធីសាស្រ្ត ដែលជំរុញដោយទិន្នន័យ ខណៈសសរស្តម្ភទី៤ នឹងលើកកម្ពស់ប្រព័ន្ធអេកូឡូស៊ីឌីជីថល ដែលកំពុងរីកចម្រើន នៅក្នុងវិស័យអចលនទ្រព្យ។

សសរស្តម្ភទី៥ ផ្តោតលើការផ្លាស់ប្តូរទៅរកវប្បធម៌គិតគូរពីបុគ្គលិកជាសំខាន់ទី១ និងការប្រើប្រាស់វិធីសាស្រ្តផ្តោតលើមនុស្ស។

យោងតាមទិន្នន័យថ្មីៗ ដែលចេញផ្សាយ ដោយមន្ទីរដែនដីក្រុងឌូបៃ (DLD) បង្ហាញថា គិតត្រឹមថ្ងៃទី២៦ ខែធ្នូ ទីផ្សារអចលនទ្រព្យក្រុងឌូបៃ សម្រេចបានប្រតិបត្តិការលក់ចំនួន៥១៥ប្រតិបត្តិការ ដែលមានតម្លៃសរុប៤០៨លានដុល្លារ និងកិច្ចព្រមព្រៀងអំណោយ ដែលមានតម្លៃ៣៧,៥លានដុល្លារ៕