ដោយៈ សុខុម
សេអ៊ូល: កូរ៉េខាងត្បូងបានប្ដេជ្ញាថា ខ្លួននឹងជួយអារ៉ាប៊ីសាអូឌីត ឱ្យទទួលបានជោគជ័យ ក្នុងការសាងសង់ទីក្រុងថ្ងៃអនាគតធំបំផុត ក្នុងលោក NEOM។
មន្រ្តីជាន់ខ្ពស់កូរ៉េបានអះអាងថា ខ្លួនមានចំណេះជំនាញច្បាស់លាស់ និងបទពិសោធន៍ខ្ពស់ ខាងរៀបចំផែនការទីក្រុង និងការសាងសង់ហេដ្ឋារចនាសម្ព័ន្ធ។ នេះបើយោងតាមសារព័ត៌មាន Korea Times ចុះផ្សាយកាលពីថ្ងៃអាទិត្យ ទី០១ មករា។
តាមរយៈបទសម្ភាសន៍មួយកាលពីពេលថ្មីៗនេះ ជាមួយសារព័ត៌មានខាងលើនេះ លោក Won Hee-ryong រដ្ឋមន្ត្រីក្រសួងដែនដី ហេដ្ឋារចនាសម្ព័ន្ធ និងដឹកជញ្ជូនកូរ៉េខាងត្បួង បានគូសបញ្ជាក់ថា គម្រោងទីក្រុងឆ្លាតវៃនាថ្ងៃអនាគតNEOM នឹងក្លាយជាគម្រោងដំបូងគេបង្អស់ ក្នុងចំណោមគម្រោងរួមគ្នាជាច្រើនរវាងកូរ៉េខាងត្បូង និងអារ៉ាប៊ីសាអូឌីត ដែលរួមបញ្ចូលគ្នានូវការកសាងប្រព័ន្ធដឹកជញ្ជូន វប្បធម៌ ការការពារជាតិ ថាមពលនិងបច្ចេកវិទ្យាទំនាក់ទំនងព័ត៌មាន (ICT)។
ព្រះអង្គម្ចាស់រាជទាយាទ Mohammed bin Salman ដែលជានាយករដ្ឋមន្ត្រីអារ៉ាប៊ីសាអូឌីត បានផ្តួចផ្តើមគម្រោង៥ដំណាក់កាលនេះក្នុងឆ្នាំ២០១៧ ដើម្បីសាងសង់ទីក្រុងថ្ងៃអនាគត ដ៏ធំបំផុតក្នុងលោក NEOM តម្លៃ៥០០ពាន់លានដុល្លារអាមេរិក លើផ្ទៃដីរហូតដល់ទៅ២៦.៥០០គីឡូម៉ែត្រការ៉េក្នុងខេត្ត Tabuk ដែលស្ថិតនៅតាមបណ្តោយឆ្នេរសមុទ្រភាគពាយ័ព្យនៃប្រទេសជាប់សមុទ្រក្រហម (Red Sea) មួយនេះ។
លោក Won Hee-ryong ថ្លែងថា “សម្ព័ន្ធភាពកូរ៉េខាងត្បូង-អារ៉ាប៊ីសាអូឌីត និងការជឿទុកចិត្តគ្នាទៅវិញទៅមក នឹងកាន់តែរ៉ឹងមាំជាងពេលណាៗទាំងអស់។ ក្រុមហ៊ុនសាងសង់ និងក្រុមហ៊ុនបង្កើតរោងចក្រក្នុងស្រុកសំខាន់ៗចាប់តាំងពីទសវត្សរ៍ឆ្នាំ១៩៧០ បានសាងកំណត់ត្រាឯកទគ្គម្មខាងសាងសង់ប្រកបដោយគុណភាព ដែលនេះជាមោទកភាព និងជាចំណុចខ្លាំង សម្រាប់បណ្ដាក្រុមហ៊ុនក្នុងស្រុកសំខាន់ៗទាំងនោះ ដែលត្រូវបានទទួលស្គាល់ យ៉ាងទូលំទូលាយពីសំណាក់អារ៉ាប៊ីសាអូឌីត”។
ចាប់តាំងពីឆ្នាំ១៩៦៥ អារ៉ាប៊ីសាអូឌីត បានចុះហត្ថកិច្ចសន្យាម៉ៅការសាងសង់ ជាមួយក្រុមហ៊ុនក្រៅប្រទេស សរុប១៥៦ពាន់លានដុល្លារអាមេរិក ដែលស្មើនឹង១៧%នៃទំហំម៉ៅការសាងសង់សរុប ដែលកូរ៉េខាងត្បូង ទទួលបាន។
ចំណុចនេះបានជួយឱ្យប្រទេសកូរ៉េខាងត្បូង ក្លាយជាទីផ្សារសាងសង់ធំបំផុតទី៥ របស់ពិភពលោកជាមួយនឹងទំហំម៉ៅការ សាងសង់នៅក្រៅប្រទេសសរុប៩២៧ពាន់លានដុល្លារអាមេរិក ក្នុងរយៈពេល៥ទសវត្សរ៍មកនេះគិតត្រឹមថ្ងៃទី២១ ខែធ្នូ ឆ្នាំ២០២២។
ប្រាក់ចំណូលធំបំផុតទី២ របស់ប្រទេសកូរ៉េខាងត្បូង ដែលបានពីការម៉ៅការសាងសង់ នៅក្រៅប្រទេសសរុប៨៣,១ពាន់លានដុល្លារអាមេរិក គឺបានពីប្រទេសអារ៉ាប់រួមអេមីរ៉ាត៕ Korea Times៕
