ដោយ៖ សុផារី
ភ្នំពេញ៖ សម្តេចតេជោ ហ៊ុន សែន បានថ្លែងថា សម្តេចកំពុងស្វះស្វែងរកឥណទានពីចិន ដើម្បីសាងសង់ហេដ្ឋារចនាសម្ព័ន្ធ។ ក្នុងនោះ រដ្ឋាភិបាលក៏កំពុងរកឥណទាន ដើម្បីសាងសង់ផ្លូវមួយខ្សែត្រើយខាងលិចទន្លេមេគង្គក្នុងខេត្តក្រចេះ ភ្ជាប់ទៅខេត្តកំពង់ធំ។
សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងក្នុងពីធីបើកការដ្ឋានសាងសង់ ស្ពានឆ្លងកាត់ទន្លេមេគង្គខេត្តក្រចេះ និងផ្លូវតភ្ជាប់ នៅព្រឹកថ្ងៃទី២ ខែមករា ឆ្នាំ២០២៣នេះថា ខេត្តក្រចេះជាខេត្តមួយត្រូវប៉ាន់សម្រាប់ឆ្នាំថ្មី លើហេដ្ឋារចនាសម្ព័ន្ធ។
សម្តេចតេជោ ហ៊ុន សែន បានបញ្ជាក់ថា ភាពរីកចម្រើន នៃហេដ្ឋារចនាសម្ព័ន្ធតភ្ជាប់ រួមមាន ផ្លូវ ស្ពានជាដើម ធ្វើឱ្យតំបន់នានាកាន់តែខិតជិតគ្នា ដែលការខិតជិតគ្នានេះ ដោយសារស្ពានឆ្លងស្រួល ផ្លូវធ្វើដំណើលឿន និងចំណេញពេលវេលា។
សម្តេចតេជោ ហ៊ុន សែន បានបន្តថា “ខ្ញុំសង្ឃឹមថា ការសិក្សាជាបន្តទៅទៀតអំពីកំណាត់ផ្លូវមួយខ្សែតភ្ជាប់ ដើម្បីភ្ជាប់ទៅខេត្តកំពង់ធំ ត្រូវបានសិក្សានិងដាក់ចេញជាគម្រោង ព្រោះនេះជាការបម្រួញនៅក្នុងការធ្វើដំណើរ”។
សម្តេចតេជោបានមានប្រសាសន៍ថា តាមរយៈគម្រោងនេះនឹងផ្តល់ផលប្រយោជន៍ដល់អ្នកដែលរស់នៅក្នុងខេត្តនៃភូមិភាគកណ្តាល ដូចជា កំពង់ធំ សៀមរាប ព្រះវិហារ និងប្រជាជននៅក្នុងខេត្តភាគខាងកើត រួមមាន ក្រចេះ ស្ទឹងត្រែង រតនគិរី មណ្ឌលគិរី ជាដើម។
សម្តេចតេជោបញ្ជាក់ថា “អ្នកនៅភូមិភាគកណ្តាលមិនចាំបាច់ធ្វើដំណើរវាងឆ្ងាយទេ។ ឧទាហរណ៍ អ្នកកំពង់ធំ សៀមរាប ព្រះវិហារ អាចធ្វើដំណើរកាត់ឆ្លងតាមរយៈផ្លូវមួយខ្សែនេះ។ ចំណែក អ្នកក្រចេះ ស្ទឹងត្រែង រតនគិរី មណ្ឌលគិរី ចង់ទៅលេងសៀមរាបអាចធ្វើដំណើរតាមផ្លូវនេះផងដែរ ជិតជាង។ ចំណុចនេះជាចំណុចតភ្ជាប់ធំណាស់ ហើយវាបំពេញសេចក្តីត្រូវការនៃការអភិវឌ្ឍនៃប្រទេសកម្ពុជាផងដែរ”៕
