ដោយ៖ សហការី
កំពង់ឆ្នាំង៖ គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគខាងត្បូង ដែលមានប្រវែងជាង១៣៥គីឡូម៉ែត្រ ត្រូវបានប្រកាសបើកឱ្យធ្វើចរាចរណ៍ទាំងសងខាង ចាប់ពីគីឡូម៉ែត្រ ៧៤+០០០ ដល់១១៥+០០០ នៅក្នុងខេត្តកំពង់ឆ្នាំង។
នេះបើយោងតាមសេចក្តីជូនដំណឹងរបស់មន្ទីរសាធារណការ និងដឹកជញ្ជូនខេត្តកំពង់ឆ្នាំង បានឲ្យដឹងថា ចាប់ពីរសៀលថ្ងៃទី០២ ខែមករា ឆ្នាំ២០២៣នេះតទៅ កំណាត់ផ្លូវជាតិលេខ៥ថ្មី រួមទាំងផ្លូវវាងក្រុងកំពង់ឆ្នាំងចាប់ ពីគីឡូម៉ែត្រ ៧៤+០០០ ដល់១១៥+០០០ ស្ថិតក្នុងស្រុករលាប្អៀរ និងស្រុកបរិបូណ៌ ខេត្តកំពង់ឆ្នាំង នៃគម្រោងធ្វើឲ្យប្រសើរឡើងវិញ កំណាត់ផ្លូវជាតិលេខ៥ ភាគខាងត្បូង (ព្រែកក្តាម+ធ្លាម្អម) ត្រូវបានអនុញ្ញាតឱ្យធ្វើចរាចរណ៍ទាំងសងខាង។
គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគខាងត្បូងនេះមានប្រវែង១៣៥,២៥ គីឡូម៉ែត្រ ត្រូវបានចាប់ផ្តើមសាងសង់ចេញពីចាប់ពីព្រែកក្តាម (ខេត្តកណ្តាល) ដល់ ធ្លាម្អម ខេត្តពោធិ៍សាត់ គ្រោងចំណាយថវិកាប្រមាណ២៤៦លានដុល្លារអាមេរិក។
គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគខាងត្បូងនេះ បានបើកការដ្ឋានសាងសង់នៅថ្ងៃទី២១ ខែឧសភា ឆ្នាំ២០១៨ គ្រោងចំណាយពេលសាងសង់ចំនួន៤៨ខែ និងត្រួតពិនិត្យបច្ចេកទេសដោយ ក្រុមហ៊ុនទីប្រឹក្សាបច្ចេកទេស Katahira & Engineer International Joint Venture with Oriental Consultant Global ៕
