សុខុម
សេអ៊ូល: ប្រធានសមាគមក្រុមហ៊ុនសាងសង់កូរ៉េខាងត្បូង បានជំរុញឱ្យរដ្ឋាភិបាលពន្យារការបន្ធូរបន្ថយពន្ធ និងបង្កើនការផ្ដល់ជំនួយហិរញ្ញវត្ថុផ្សេងទៀតជាបន្ទាន់ ខណៈតម្រូវការក្នុងទីផ្សារកំពុងដាំក្បាលចុះ និងមានវិបត្តិសាច់ប្រាក់។ នេះបើយោងតាមសារព័ត៌មាន Korea Times ចុះផ្សាយកាលពីថ្ងៃទី០២ ខែមករា។
លោក Kim Sang-soo ប្រធានសមាគមក្រុមហ៊ុនសាងសង់នៃប្រទេសកូរ៉េ (Construction Association of Korea) បានថ្លែងសារក្នុងឱកាសឆ្នាំថ្មី ឆ្នាំសកលថា “ទីផ្សារលំនៅដ្ឋាន និងសំណង់កំពុងត្រូវការជំនួយ ពីរដ្ឋាភិបាលជាបន្ទាន់”។
នៅពីក្រោយភាពបន្ទាន់នេះ គឺពិតជាមានការលំបាកយ៉ាងខ្លាំង នៅក្នុងវិស័យសំណង់ ក្នុងឆ្នាំកន្លងទៅ រួមទាំងការកាត់បន្ថយយ៉ាងច្រើន នូវការចំណាយរបស់រដ្ឋាភិបាល លើមូលធនចំណាយ លើសង្គម (SOC) ការធ្លាក់ដាំក្បាលចុះ នៃឧស្សាហកម្មលំនៅដ្ឋាន និងសំណង់ និងការបរាជ័យផ្នែកហិរញ្ញប្បទានគម្រោងផងដែរ។
លោក Kim Sang-soo លើកឡើងទៀតថា “យើងនឹងធ្វើឱ្យការវិនិយោគដែលដឹកនាំដោយឯកជនកាន់តែល្អប្រសើរឡើង ខណៈរដ្ឋាភិបាលបង្កើនការចំណាយលើសង្គម (SOC) ដើម្បីបង្កើតការងារកាន់តែច្រើន និងស្ដារសេដ្ឋកិច្ចក្នុងតំបន់ ដែលដាំក្បាលចុះឱ្យងើបឡើងវិញ”។
ស្រដៀងគ្នានេះដែរ លោក Park Sun-ho ប្រធានសមាគមក្រុមហ៊ុនម៉ៅការអន្តរជាតិនៃប្រទេសកូរ៉េ (International Contractors Association of Korea) លើកឡើងថា ការរឹតបន្តឹងលក្ខខណ្ឌទីផ្សារសំណង់ក្នុងពិភពលោកនៅឆ្នាំនេះនឹងបង្កហានិភ័យធំដល់បណ្ដាក្រុមហ៊ុនសាងសង់ក្នុងស្រុក។
លោកបានថ្លែងសារក្នុងឱកាសឆ្នាំថ្មី ឆ្នាំសកលថា “យើងត្រូវការភាពធន់ទ្រាំ ច្រើនជាងពេលណាៗទាំងអស់ ដើម្បីទប់ទល់ស្ថានការណ៍មិនច្បាស់លាស់ភ្លាមៗ និងផលប៉ះពាល់រយៈពេលវែង ដែលបង្កឡើងដោយវិបត្តិកូវីដ-១៩”។
លោកបន្ថែមទៀតថា “សេដ្ឋកិច្ចពិភពលោកបានដាំក្បាលចុះ ដោយសារវត្ថុធាតុដើមឡើងថ្លៃ និងការរាំងស្ទះខ្សែសង្វាក់ផ្គត់ផ្គង់។ ហើយទោះបីជាមានកត្តាមិនអំណោយផលទាំងនេះក្ដី ក៏យើងនឹងបន្តប្រឹងប្រែងជំរុញឱ្យការទំហំម៉ៅការសាងសង់ នៅក្រៅប្រទេសកើនលើស៩០០ពាន់លានដុល្លារដែរ”៕ Korea Times៕
