ដោយ៖ ផារី
ភ្នំពេញ៖ សាងសង់ព្រលានយន្តហោះអន្តរជាតិភ្នំពេញ និងក្រុងព្រះសីហនុ បានសម្រេចវឌ្ឍនភាពល្អប្រសើរ ទោះបីជាប្រឈមនឹងវិបត្តិជំងឺ និងវិបត្តិសេដ្ឋកិច្ចនាពេលកន្លងមកក្តី។ រហូតមកដល់ពេលនេះ គម្រោងព្រលានយន្តហោះអន្តរជាតិភ្នំពេញសម្រេចបានប្រមាណ៥០ភាគរយ ខណៈព្រលានយន្តហោះក្រុងព្រះសីហនុគ្រោងពង្រីកបន្ថែមឆាប់ៗ។
លោក ជា អូន រដ្ឋលេខាធិការប្រចាំការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានបញ្ជាក់កាលពីសប្តាហ៍កន្លងមកថា ទោះបីក្នុងស្ថានភាពវិបត្តិកូវីដ១៩ កំពុងរីករាលដាលនៅទូទាំងសកលលោកចាប់តាំងពីឆ្នាំ២០២០រហូតមកក្តី ការសាងសង់ព្រលានយន្តហោះអន្តរជាតិភ្នំពេញនិងខេត្តព្រះសីហនុ ក៏បន្តធ្វើតាមផែនការ។
លោកជា អូន បានថ្លែងប្រាប់ថា បច្ចុប្បន្នរាជរដ្ឋាភិបាលកម្ពុជា ដឹកនាំដោយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា កំពុងបន្តពង្រីកសក្ដានុពលលើវិស័យអាកាសចរស៊ីវិលកម្ពុជា បង្កើតចំនួនទេសចរ និងការដឹកជញ្ជូនបន្ថែមទៀតតាមរយៈជើងហោះហើរមកកាន់ប្រទេសកម្ពុជា។
លោកបានបញ្ជាក់ថា “ក្នុងបរិបទកូវីដ១៩ ដែលបានប៉ះពាល់នៅទូទាំងពីភពលោក គឺយើងបានឃើញភាពឈ្លាសវៃរបស់ សម្ដេចតេជោ បានចាក់ស្រោចវ៉ាក់សាំងដល់ប្រជាពលរដ្ឋនៅទូទាំងប្រទេស ដូច្នេះកម្មករដែលធ្វើការនៅការដ្ឋានសាងសង់ព្រលានយន្តហោះ ក៏ដូចជាហេដ្ឋារចនាសម្ព័ន្ធដទៃទៀត មិនឈប់ឈរឡើយ”។
លោកបានគូសបញ្ជាក់ថា បច្ចុប្បន្នការសាងសង់ព្រលានយន្តហោះអន្តរជាតិភ្នំពេញ ដែលមួយផ្នែកខ្លះស្ថិតនៅក្នុងក្រុងតាខ្មៅ និងស្រុកកណ្តាលស្ទឹង ខេត្តកណ្តាល និងដីខ្លះស្ថិតនៅក្នុងស្រុកបាទី ខេត្តតាកែវ បច្ចុប្បន្នសាងសង់បានប្រមាណ៥០ភាគរយ ហើយគ្រោងបញ្ចប់ការសាងសង់ជំហានដំបូងនៅឆ្នាំ២០២៤។
អាកាសយានដ្ឋានអន្តរជាតិខេត្តព្រះសីហនុ ដែលបានធ្វើការពង្រីកនោះ នាអំឡុងពេលកូវីដ១៩ រយៈពេលជាង២ឆ្នាំកន្លងមកនេះ គឺបានធ្វើការពង្រីកការស្ថាបនាបាន១០០ភាគរយហើយ ហើយថ្មីៗនេះ ក្រុមហ៊ុនអភិវឌ្ឍន៍ក៏បានបង្ហាញផែនការពង្រីកបន្ថែម ដើម្បីទទួលស្វាគមន៍អ្នកដំណើរច្រើនជាងមុនកាន់តែច្រើន៕
