ដោយ: សុផារី
កំពង់ចាម: គម្រោងហេដ្ឋារចនាសម្ព័ន្ធតែងតែជំរុញឲ្យតំបន់មួយមានការអភិវឌ្ឍច្រើនជាងមុន។ ជាក់ស្ដែងគម្រោងលើកកម្ពស់ផ្លូវជាតិលេខ៧ ដែលតភ្ជាប់ ពីស្គន់ទៅកាន់ក្រុងកំពង់ចាម បាននិងកំពុងហុចផលដល់អចលនទ្រព្យក្នុងខេត្តកំពង់ចាម ជាពិសេសក្នុងតំបន់ចំនួនពីរ។
លោកស្រី ក្រី ម៉ាយ៉ាន ប្រធានសាខានៃក្រុមហ៊ុនអចលនទ្រព្យ KW Cambodia ប្រចាំខេត្តកំពង់ចាម បានមានប្រសាសន៍ឲ្យដឹងកាលពីចុងសប្តាហ៍កន្លងមកថា ក្រោយការប្រកាសពីគម្រោងការសាងសង់ និងស្តារឡើងវិញកំណត់ផ្លូវជាតិលេខ៧ តភ្ជាប់ពីស្គន់មកកំពង់ចាម គេសង្កេតឃើញថាតំបន់ចំនួនពីរហាក់មានសភាពអ៊ូអរ និងមានចរន្តទិញលក់ដីច្រើនជាងមុននោះគឺតំបន់ល្វា និងស្គន់។
លោកស្រីមានប្រសាសន៍ថា “មួយរយៈចុងក្រោយនេះមានគម្រោងរោងចក្រសកម្មនិងសហគ្រាសមួយចំនួនធំបានបោះជើងចូលមកវិនិយោគនៅក្នុងតំបន់តាមបណ្ដោយផ្លូវនេះ”។
លោកស្រី បានបញ្ជាក់ឲ្យដឹងថា កាលពីពេលថ្មីៗនេះមានគម្រោងរោងចក្រឧស្សាហកម្មកាត់ដេរ និងកែច្នៃធំមួយបានបោះទុន មកវិនិយោគនៅតាមបណ្ដោយផ្លូវនេះក្នុងទំហំដី៦៩ហិចតា និងចំណាយទុនរាប់លានដុល្លារអាមេរិក។
ជាមួយគ្នានេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងថា ក្រសួងសាធារណការការសាងសង់ពង្រីកកំណាត់ផ្លូវជាតិលេខ៧នេះឡើងវិញ គឺដើម្បីឆ្លើយតបទៅនឹងការរីកចម្រើនរបស់ប្រទេសជាតិនាពេលបច្ចុប្បន្ន ជាពិសេសទំហំចរាចរណ៍ និងកំណើននៃការដឹកជញ្ជូនដែលមានការ កើនឡើងយ៉ាងគំហុកពីមួយថ្ងៃទៅមួយថ្ងៃ។
ក្រោយបញ្ចប់ការសាងសង់ កំណាត់ផ្លូវជាតិនេះ នឹងក្លាយជាខ្សែផ្លូវមួយ ដ៏រឹងមាំ ធំទូលាយ និងដើរតួនាទីយ៉ាងសំខាន់ក្នុងការជួយសម្រួល ការធ្វើដំណើរ និងការដឹកជញ្ជូនផលិតផលកសិកម្ម កសិឧស្សាហកម្ម ព្រមទាំងលើកកម្ពស់ការអភិវឌ្ឍ និងសកម្មភាពសេដ្ឋកិច្ច-សង្គម នៅភូមិ សាស្ត្រខេត្តកំពង់ចាម និងបណ្ដាខេត្តនៅជាប់ព្រំប្រទល់ ដែលមានសក្តានុពលក្នុងការផ្លាស់ប្ដូរពាណិជ្ជកម្មលើទំនិញ និងកសិផលសំខាន់ៗមួយចំនួន ដូចជា កៅស៊ូ អង្ករ ម្រេច ដំឡូងមី ស្វាយចន្ទី ពោត ចេក អំពៅ ថ្នាំជក់ ទុរេន បន្លែផ្លែឈើ និងត្រីសាច់ ជាដើម។
កំណាត់ផ្លូវជាតិនេះក៏ចូលរួមចំណែកក្នុងការលើកកម្ពស់វិស័យទេសចរណ៍នៅក្នុងខេត្តកំពង់ចាម ដែលមានប្រាសាទបុរាណ រមណីយដ្ឋានធម្មជាតិ និងវប្បធម៌ប្រវត្តិសាស្ត្រផងដែរ។
ជាងនេះទៀត កំណាត់ផ្លូវជាតិនេះនឹងសម្រួលការតភ្ជាប់ការដឹកជញ្ជូន ទំនិញ និងផលិតផលរបស់ខេត្តកំពង់ចាម និងខេត្តជាប់ព្រំប្រទល់ទៅ កាន់កំពង់ផែទន្លេបិទ ដែលកំពុងសាងសង់ ដើម្បីនាំចេញទៅកាន់ទីផ្សារ ក្នុងស្រុកនិងអន្តរជាតិ តាមរយៈការដឹកជញ្ជូន៕
