ដោយៈ សុខុម
ហុងកុង: ទីក្រុងនានានៃប្រទេសចិន បានកំណត់គោលដៅកំណើនសេដ្ឋកិច្ចខ្ពស់ៗ ប្រកបដោយសុទិដ្ឋិនិយមសម្រាប់ឆ្នាំ២០២៣ បើធៀបនឹងកំណើនជាក់ស្តែង ដែលទទួលបានទាបជាងកាលពីឆ្នាំមុន ខណៈធនាគារកណ្តាលចិន បានប្តេជ្ញាអនុវត្តគោលនយោបាយគាំទ្រហិរញ្ញវត្ថុ ដើម្បីជួយជំរុញឱ្យសេដ្ឋកិច្ចចិន ងើបឡើងវិញ។
ទីក្រុងមួយចំនួនដែលមានផលទុនជាតិសរុប (GDP) លើសពី១ទ្រីលានយ័ន (១៤៨ពាន់លានដុល្លារអាមេរិក) កាលពីឆ្នាំមុនរួមមានទាំងក្រុងជឹងចូវ (Zhengzhou) ក្រុងឆាងសា (Changsha) និងក្រុងគ័ងចូវ ឬ ក្វាងចូវ (Guangzhou) ផងដែរនោះ បានបង្ហាញគោលដៅកំណើន GDP សម្រាប់ឆ្នាំ២០២៣ ចន្លោះពី៥,៥%ទៅ៧%។ នេះបើយោងតាមសារព័ត៌មាន South China Morning Post ចុះផ្សាយកាលពីថ្ងៃច័ន្ទ ទី៩ ខែមករា។
បើធៀបទៅនឹងគោលដៅរបស់ខ្លួនក្នុងឆ្នាំ២០២២ ទីក្រុងជាច្រើនបានទម្លាក់គោលដៅកំណើនរបស់ខ្លួនបន្តិច សម្រាប់ឆ្នាំ២០២៣ ប៉ុន្តែគោលដៅកំណើនទាំងនេះ នៅតែខ្ពស់ជាងកំណើនជាក់ស្តែង ដែលទទួលបានកាលពីឆ្នាំមុន ចំពេលសន្ទុះសេដ្ឋកិច្ចចុះខ្សោយ និងគោលនយោបាយសូន្យកូវីដ-១៩។
យោងតាមប្រព័ន្ធផ្សព្វផ្សាយក្នុងស្រុកឱ្យដឹងថា ទីក្រុងក្វាងចូវ (Guangzhou) នៃខេត្តគ័ងតុង ឬ ក្វាងទុង (Guangdong) ភាគខាងត្បូងប្រទេសចិន បានបញ្ចេញគោលដៅកំណើន GDP សម្រាប់ឆ្នាំ២០២៣ ចំនួន៦% បន្ទាប់ពីកំណើនរបស់ខ្លួនអំឡុង៣ត្រីមាសដំបូង នៃឆ្នាំ២០២២ មានត្រឹមតែ២,៣%។
ទន្ទឹមនេះ ទីក្រុងជឹងចូវ (Zhengzhou) នៃខេត្តហឺណាន (Henan) ភាគកណ្តាលប្រទេសចិន បានកំណត់គោលដៅកំណើនរបស់ខ្លួនក្នុងកម្រិត៧%សម្រាប់ឆ្នាំ២០២៣ បន្ទាប់ពីកំណើនសេដ្ឋកិច្ចជាក់ស្ដែងរបស់ខ្លួនទទួលបានប្រមាណ២%កាលពីឆ្នាំមុន។ នេះបើយោងតាមស្ថិតិដែលចេញផ្សាយដោយរដ្ឋាភិបាលថ្នាក់តំបន់។
ចំណែកឯទីក្រុងLhasa ដែលជារដ្ឋធានីនៃតំបន់ភ្នំស្វយ័តទីបេតិ៍ បានដាក់គោលដៅកំណើនGDP របស់ខ្លួនក្នុងរង្វង់១០%សម្តាប់ឆ្នាំ២០២៣។ គោលដៅកំណើននេះ គឺខ្ពស់បំផុតរហូតមកទល់ពេលនេះ ហើយភាគច្រើនដោយសារតែសេដ្ឋកិច្ចទីក្រុងនេះមានទំហំតូច។
ទីក្រុងសេដ្ឋកិច្ចមួយចំនួនដូចជាទីក្រុងប៉េកាំង និងសៀងហៃ ជាដើមនៅតែមិនទាន់ បានបញ្ចេញនូវគោលដៅកំណើនGDP របស់ខ្លួនសម្រាប់ឆ្នាំ២០២៣នៅឡើយទេ ប៉ុន្តែសង្កាត់មួយចំនួនរបស់នៃក្រុង ទាំងនោះបានបញ្ចេញជាបណ្ដើរៗហើយ។
តួយ៉ាងនៅទីក្រុងសៀងហៃ តំបន់ Pudong New Area បានកំណត់គោលដៅរបស់ខ្លួនក្នុងអត្រា៧% ខណៈសង្កាត់ Dongcheng ក្នុងទីក្រុងប៉េកាំង កំណត់គោលដៅកំណើនប្រមាណ៥%នៅឆ្នាំនេះ៕ South China Morning Post៕
