ដោយៈ គង់ សូរិយា
ភ្នំពេញៈ ខុនដូបានក្លាយជាផ្នែកមួយ នៃវិស័យអចលនទ្រព្យនៅកម្ពុជា ដែលបានចាប់ផ្តើមមានប្រជាប្រិយភាពលើទីផ្សារ ស្របពេលអ្នកវិនិយោគក្នុងស្រុក បានក្លាយជាតួអង្គសំខាន់ក្នុងផ្នែកនេះ។
យោងតាមការសិក្សាថ្មីមួយ ដែលបានធ្វើឡើងដោយក្រុមហ៊ុនPropNex Cambodiaបានបង្ហាញឲ្យដឹងកាលពីថ្ងៃម្សិលម៉ិញនេះថា គិតរហូតដល់ដំណាច់ឆ្នាំ២០២២ ចំនួនខុនដូ១១៤គំរោងបានបញ្ចប់ការសាងសង់ ដោយមានយូនីតខុនដូចំនួន៥៤,៤៩៤បានដាក់ចូលទីផ្សារ។
ការសិក្សាដដែលបានរកឃើញថា ខុនដូលំដាប់Grande B និងGrande C បានទទួលការពេញនិយមជាងគេក្នុងទីផ្សារកម្ពុជា។
ជាមួយគ្នានេះ អ្នកស្រីអាន សុធីតាអគ្គនាយិកាក្រុមហ៊ុនPropNex Cambodiaបានមានប្រសាសន៍ឲ្យដឹងថា ការវិនិយោគខុនដូ អ្នកវិនិយោគត្រូវគិតទៅលើកត្តាមួយចំនួន មុនសម្រេចចិត្តទិញ គឺការទិញសម្រាប់រស់នៅ ការទិញសម្រាប់ទុកឲ្យឡើងថ្លៃ និងការទិញសម្រាប់ជួលយកប្រាក់ចំណេញ។
អ្នកស្រីបានអះអាងថា “បើទិញខុនដូទុកជួលយកចំណេញ អ្នកវិនិយោគគួរជ្រើសរើសតំបន់បឹងកេងកង១ ដែលជាតំបន់មានតម្រូវការជួលខ្ពស់ ព្រោះតំបន់នេះជាផ្នែកមួយ ដែលមានភាពល្បីល្បាញក្នុងចំណោមជនបរទេសនៅរាជធានីភ្នំពេញ”៕
