ដោយៈ សុផារី
ភ្នំពេញៈ ទោះបីប្រឈមវិបត្តិកូវីដ១៩ រយៈពេល៣ឆ្នាំកន្លងមកក្តី គម្រោងវិនិយោគ នៅក្នុងប្រទេសកម្ពុជាបន្តគាំទ្រ ដោយអ្នកវិនិយោគិនក្នុងស្រុក ដែលរួមចំណែកជាង៥០ភាគរយ នៃគម្រោងទាំងអស់នៅក្នុងឆ្នាំ២០២២។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) ដែលចេញផ្សាយនៅដើមខែមករា ឆ្នាំ២០២៣នេះ បានបង្ហាញថា ពេញមួយឆ្នាំ២០២២ រាជរដ្ឋាភិបាលកម្ពុជា បានសម្រេចការអនុម័តគម្រោងវិនិយោគសរុបចំនួន១៨៦គម្រោង ក្រោមទុនវិនិយោគសរុប ៤០៣៣លានដុល្លារអាមេរិក និងអាចបង្កើតការងារប្រមាណ១៤៤ពាន់កន្លែង។
ក្នុងចំណោមគំរោងវិនិយោគទាំងនោះ វិនិយោគិនក្នុងស្រុក បានបន្តឈរលំដាប់លេខរៀងទី១ ដែលបោះទុនវិនិយោគច្រើនជាងគេ ដោយវិនិយោគិនក្នុងស្រុក បានបោះទុនវិនិយោគ នូវទឹកប្រាក់២.១៥៩លានដុល្លារ រួមចំណែកចំនួន៥៣,៥៤ភាគរយ នៃទុនវិនិយោគសរុប ខណៈប្រទេសចិនឈរលើលេខរៀងទី២ មានទំហំទឹកប្រាក់វិនិយោគ១.៦៩៤លានដុល្លារ ស្មើនឹង៤២,០១ភាគរយ។
លំហូរទុនវិនិយោគក្នុងឆ្នាំ២០២២ ប្រមូលផ្ដុំតែមកពីក្នុងស្រុក និងមកពីប្រទេសចិន ដែលបានរួមចំណែកជិត៩៦ភាគរយ នៃទុនវិនិយោគសរុប ខណៈការវិនិយោគមកពីប្រទេស និងតំបន់ផ្សេងៗមានកម្រិតទាប។
ជាមួយគ្នានេះ គម្រោងវិនិយោគនៅតែប្រមូលផ្តុំ នៅរាជធានីភ្នំពេញ និងបណ្តាខេត្តជុំវិញរាជធានីភ្នំពេញ គឺខេត្តកណ្តាល ខេត្តកំពង់ស្ពឺ ខេត្តតាកែវ និងនៅខេត្ត ដែលមានការអភិវឌ្ឍតំបន់សេដ្ឋកិច្ចពិសេសច្រើន គឺខេត្តស្វាយរៀង និងខេត្តព្រះសីហនុ៕
