ដោយ៖ សុខុម
រីយ៉ាដ: ព្រះអង្គម្ចាស់រាជទាយាទ Mohammed bin Salman បានប្រកាសគម្រោងខ្នាតយក្ស Diriyah ដែលគ្រោងវិនិយោគទឹកប្រាក់រហូតដល់ទៅ៥០ពាន់លានដុល្លារ។
វាជាគម្រោងមួយ ក្នុងចំណោមគម្រោងខ្នាតយក្សជាច្រើន របស់មូលនិធិវិយោគសាធារណៈ (PIF) នៃប្រទេសអារ៉ាប៊ីសាអូឌីត។ ជាមួយនឹងការប្រកាសនេះ គម្រោង Diriyah បានក្លាយជាគម្រោងខ្នាតយក្សទី៥ របស់មូលនិធិវិយោគសាធារណៈ (PIF)។
យោងតាមការចុះផ្សាយរបស់សារព័ត៌មាន Arab News ឱ្យដឹងថា គម្រោងខ្នាតយក្សផ្សេងៗទៀតរួមមាន គម្រោងទីក្រុងឆ្លាតវៃបែបថ្ងៃអនាគត NEOM គម្រោងសមុទ្រក្រហម (Red Sea) គម្រោង Qiddiya និងគម្រោង ROSHN។
ទីភ្នាក់ងារព័ត៌មានអារ៉ាប៊ីសាអូឌីត (SPA) បានចុះផ្សាយ ដោយដកស្រង់ប្រកាសរបស់ព្រះអង្គម្ចាស់ថា កាលពីមុន ការអភិវឌ្ឍតំបន់ Diriyah ដែលជាតំបន់បេតិកភណ្ឌពិភពលោក របស់អង្គការយូណេស្កូ ធ្លាប់ស្ថិតនៅក្រោមអាជ្ញាធរអភិវឌ្ឍន៍ Diriyah Gate Development Authority ដែលនឹងបន្តការត្រួតពិនិត្យគម្រោងនេះ។
គម្រោងខ្នាតយក្ស ដែលមានតម្លៃមហាសាលទាំងនេះ បង្កើតបានជាសសរស្តម្ភដ៏សំខាន់ នៃយុទ្ធសាស្រ្តរួម របស់មូលនិធិវិយោគសាធារណៈ (PIF) ដើម្បីធ្វើពិពិធកម្មសេដ្ឋកិច្ច នៃប្រទេសអារ៉ាប៊ីសាអូឌីត តាមរយៈការបង្កើតវិស័យថ្មីៗ ការលើកកម្ពស់ភាពជាដៃគូ រវាងវិស័យសាធារណៈ និងវិស័យឯកជន និងការជំរុញការវិនិយោគ និងឱកាសការងារ។
គម្រោងដែលមានតម្លៃ៥០ពាន់លានដុល្លារនេះ នឹងមានភោជនីយដ្ឋាន និងសណ្ឋាគារប្រណីតៗបំផុតរបស់ពិភពលោក ដែលនឹងត្រូវបានឌី ហ្សាញឡើង ក្រោមរចនាប័ទ្មស្ថាបត្យកម្មបែបប្រពៃណីជនជាតិ Najdi រួមជាមួយនឹងតំបន់អភិរក្ស និងកន្លែងវប្បធម៌ផងដែរ។
ទោះជាយ៉ាងណា គ្មានសេចក្ដីលម្អិតបញ្ជាក់ថា គម្រោងនេះនឹងចាប់ផ្ដើមនៅពេលណា ហើយនឹងបញ្ចប់នៅពេលណានោះឡើយ៕
