ដោយៈ សុផារី
ភ្នំពេញៈ វិស័យអចលនទ្រព្យ បម្រើឱ្យទេសចរណ៍របស់កម្ពុជាគាំទ្រមួយផ្នែកធំ ដោយទេសចរបរទេស ជាពិសេសមកពីប្រទេសចិន។ អ្នកជំនាញបានបង្ហាញពីសុទិដ្ឋិនិយម ចំពោះការងើបឡើងវិញនៃទីផ្សារសណ្ឋាគារ នៅក្នុងឆ្នាំ២០២៣។
លោកស្រីអាន សុធីតាអគ្គនាយិកាក្រុមហ៊ុនអចលនទ្រព្យ PropNex Cambodia បានលើកឡើងនៅក្នុងកម្មវិធីបច្ចុប្បន្នភាព ទីផ្សារឆ្នាំ២០២២ និងការព្យាករណ៍ឆ្នាំ២០២៣ថា ការប្រកាសបើកប្រទេសរបស់ចិន គឺជាភាពវិជ្ជមានមួយសម្រាប់កម្ពុជា ដោយសារមុនពេលរីករាលដាល នៃជំងឺកូវីដ១៩ ការវិនិយោគរបស់ចិននៅកម្ពុជា មានអត្រារហូតដល់៤០% ដែលជាអត្រាខ្ពស់មួយ បើប្រៀបធៀបនឹងការវិនិយោគពីបណ្តាប្រទេសផ្សេងៗ។
លោកស្រីលើកឡើងថា នៅឆ្នាំ២០២៣នេះ វិស័យសណ្ឋាគារ និងបដិសណ្ឋាកិច្ច នឹងបន្តមានកំណើនក្នុងភាពវិជ្ជមាន ដោយសារក្នុងឆ្នាំនេះ ជឿជាក់ថា កម្ពុជានឹងទាក់ទាញបានភ្ញៀវទេសចរជាច្រើន ជាពិសេសចំពេលប្រទេសចិនបើកឡើងវិញ ខណៈសម្រាប់ឆ្នាំ២០២២ វិស័យសណ្ឋាគារ បានរើបឡើងមកវិញបន្តិច។
លោកស្រីលើកឡើងថា “នៅឆ្នាំ២០២៣នេះ យើងមិនអាចថា វិស័យសណ្ឋាគារងើបឡើងវិញ១០០%ទេ គឺងើបឡើងសន្សឹមៗ”។ លោកស្រីបន្តថា “តួយ៉ាងវិស័យទេសចរណ៍នៅក្នុងឆ្នាំ២០២២ ងើបឡើងក្នុងអត្រា១០ដង បើប្រៀបធៀបជាមួយឆ្នាំ២០២០ ហេតុនេះនឹងបន្តងើបឡើងបន្ថែមទៀត នៅក្នុងឆ្នាំ២០២៣នេះដូចគ្នា”។
ក្រសួងទេសចរណ៍បានប្រកាសយុទ្ធនាការ ទស្សនាកម្ពុជាឆ្នាំ២០២៣ដោយរំពឹងថានឹងទាក់ទាញ ភ្ញៀវទេសចរអន្តរជាតិកាន់តែច្រើន ក្នុងអំឡុងពេលស៊ីហ្គេមនៅក្នុងឆ្នាំ២០២៣។
ក្រុមហ៊ុន AirAsia បានបញ្ជាក់ថា ការបើកដំណើរការនៅកម្ពុជារំពឹងថា នឹងមានជើងហោះហើរកាន់តែច្រើន។ លើសពីនេះ សង្វាក់សណ្ឋាគារអន្តរជាតិជាច្រើនទៀតត្រូវបានគេរំពឹងថា នឹងមកដោយសារតែការស្ទុះងើបឡើងវិញនៃភ្ញៀវទេសចរផងដែរ។
លោកឧកញ៉ាបណ្ឌិតគីម ហ៊ាងប្រធានKW Cambodiaបានមានប្រសាសន៍ឲ្យដឹងកាលពីល្ងាចថ្ងៃទី១៣ មករាកន្លងមកថា ប្រទេសចិនបានបើកចំហរប្រទេសកាលពីថ្ងៃទី៨ មករាកន្លងមកនេះ តាមរយៈការបើកចំហប្រទេសនេះ កម្ពុជារំពឹងទទួលបានភ្ញៀវទេសចរណ៍ចិន ប្រមាណ២លាននាក់ ដែលពួកគេអាចចាយប្រាក់២០០០លានដុល្លារនៅទីនេះ។
លោកឧកញ៉ាបានបន្តថា “វិស័យទេសចរណ៍ នឹងមានការរីកចម្រើនខ្លាំងនៅឆ្នាំ២០២៣នេះ ដែលនឹងជួយជម្រុញការរីកចម្រើនសេដ្ឋកិច្ចជាតិ”៕
