ដោយៈ សុខុម
ញូវយ៉ក: នៅមាត់ឆ្នេរសមុទ្រ Sunny Isles Beach នៅ Miami ស្ថិតក្នុងរដ្ឋផ្លរីដា (Florida) នឹងកាន់តែលើកសម្រស់ទាក់ទាញបន្ថែមមួយកម្រិតទៀតនៅឆ្នាំ២០២៦ ជាពេលដែលអគារលំនៅដ្ឋានដំបូងបង្អស់ដ៏អស្ចារ្យ របស់ក្រុមហ៊ុនអង់គ្លេសBentley Motors នឹងផុសឡើងយ៉ាងត្រដែតលើជើងមេឃ ដែលពេញទៅដោយខុនដូ និងសណ្ឋាគារប្រណីត។
អ្នកនាំពាក្យគម្រោងខាងលើនេះ បានទម្លាយឱ្យដឹងថា ដោយមានកម្ពស់២២៨ម៉ែត្រ អគារលំនៅដ្ឋាន Bentley Residences នឹងក្លាយទៅជាអគារជាប់មាត់មហាសមុទ្រ ខ្ពស់បំផុតនៅសហរដ្ឋអាមេរិក។ នេះបើយោងតាមសារព័ត៌មាន CNN ចុះផ្សាយកាលពីថ្ងៃទី៣ ខែកុម្ភៈ។
រចនាឡើងដោយក្រុមហ៊ុនស្ថាបត្យកម្ម Sieger Suarez Architects ដែលមានមូលដ្ឋាននៅ Miami អគារ៦៣ជាន់នេះ នឹងមាន២១៦យូនីតដែលសុទ្ធតែអាចគយគន់ទេសភាពមហាសមុទ្រ ហើយអ្វីដែលរឹតតែពិសេសអស្ចារ្យជាងនេះទៅទៀត គឺអគារនេះនឹងមានបំពាក់ជណ្ដើរយន្តដ៏ពិសេសមួយ ដែលអាចឱ្យអ្នកស្នាក់នៅ អាចយករថយន្តរបស់ខ្លួន ឡើងតាមជណ្ដើរយន្តនោះឡើង ទៅដល់មាត់បន្ទប់របស់ខ្លួនតែម្ដង។
លោក Charles Sieger ប្រធានក្រុមហ៊ុនស្ថាបត្យកម្មខាងលើនេះបានលើកឡើងតាមរយៈវីដេអូខលថា ជាធម្មតា អគារខ្ពស់ៗមិនអាចធ្វើបានទេ ក្នុងការយករថយន្តឡើងតាមជណ្ដើរយន្ត ហើយចតនៅខាងមុខបន្ទប់របស់អ្នកស្នាក់នៅ ដូចនេះពួកលោកកំពុងព្យាយាមធ្វើរឿងនេះឱ្យបាន។
ប្រព័ន្ធជណ្តើរយន្ត “Dezervator” ដែលមានប៉ាតង់បញ្ជាក់ទទួលស្គាល់ត្រឹមត្រូវ បានបង្ហាញវត្តមានជាលើកដំបូង នៅក្នុងអគារប៉ម Porsche Design Tower ដែលក៏ត្រូវបានរចនាឡើងដោយក្រុមហ៊ុនស្ថាបត្យកម្ម Sieger Suarez Architects។
ទោះជាយ៉ាងណា គ្មានការបញ្ជាក់ពីកាលបរិច្ឆេទជាក់លាក់ នៃការចាប់ផ្ដើមដំណើរការសាងសង់ និងទំហំទុនវិនិយោគសម្រាប់អគារលំនៅ ដ្ឋានជាប់មាត់ឆ្នេរសមុទ្រនេះឡើយ៕ CNN៕
