ដោយៈ ស៊ីវ ម៉េង
ភ្នំពេញៈ រាជរដ្ឋាភិបាលកម្ពុជា បានដាក់ផែនការពង្រីកផ្ទៃរាជធានីភ្នំពេញ ក្នុងកាំរងង្វង់៣០គីឡូម៉ែត្រក្រឡា នៅត្រឹមឆ្នាំ២០៣៥ខាងមុខ។
ប្រជាពលរដ្ឋរស់នៅជាយរាជធានីភ្នំពេញ ស្ថិតក្នុងទឹកដីខេត្តកណ្តាល បានទន្ទឹងរង់ចាំការប្រកាសនេះ ជាបន្តបន្ទាប់ដោយសារមួលហេតុជាច្រើនរូមមាន ទី១ ការពង្រីករាជធានីនឹងផ្សារភ្ជាប់ ការកើនឡើងតម្លៃដីធ្លីជាស្វ័យប្រវត្តិ ទី២ ហេដ្ឋារចនាសម្ព័ន្ឋសំខាន់ៗ នឹងទៅដល់មាត់ទ្វារផ្ទះរបស់ពួកគេ ទី៣ ការរីកចម្រើនសេដ្ឋកិច្ចមូលដ្ឋាន នឹងមានភាពល្អប្រសើរឡើង និងទី៤ ពួកគេក្លាយជាប្រជាពលរដ្ឋ រស់នៅក្នុងទីក្រុងមួយ ដែលកាន់តែធ្វើឲ្យគុណភាពជីវិត របស់ពួកគេប្រសើរឡើង និងរស់នៅប្រកបដោយភាពស៊ីវិល័យ។
អ្នកជំនាញបានមើលឃើញរួចហើយថា តម្លៃដីធ្លីបានហក់ឡើងខ្ពស់ នៅពេលរដ្ឋាភិបាលប្រកាសពីផែនការ ប្រើប្រាស់ប្លង់គោលដីធ្លី សម្រាប់ឆ្នាំ២០៣៥ខាងមុខ ដែលផែនការនេះនឹងកាត់បញ្ចូល ភាគខាងជើងនៃខេត្តកណ្តាល ស្ទើរតែទាំងអស់ចូលមកក្នុងផែនរដ្ឋបាលរាជធានី។
ទោះជាយ៉ាងណា លោកប៉ូ អ៊ាវគង់ នាយកប្រតិបត្តិក្រុមហ៊ុនអចលនទ្រព្យ Advance មិនសូវមានសុទិដ្ឋិនិយមពីល្បឿន នៃការរីកចម្រើននោះទេ ដោយលោកបានមានប្រសាសន៍ថា ការពង្រីកក្រុងភ្នំពេញ វាអាចលឿនរហ័ស អាស្រ័យលើកំណើនប្រជាជនលឿន ឬយឺតដូចគ្នា។ លោកបន្តថា បើសិនជាកំនើនលឿន លទ្ធភាពនៃការពង្រីកក៏កាន់តែលឿនដែរ តែបើសិនជាកំណើនប្រជាជន នៅរាជធានីភ្នំពេញកើនយឺត ក៏លទ្ធភាពនៃការពង្រីករាជធានីក៏យឺតដូចគ្នាដែរ ។
លោកបន្តថា “ក្នុងរយៈពេល៥ឆ្នាំទៅមុខទៀត ខ្ញុំគិតថា ទឹកដីរាជធានី មិនអាចពង្រីកឱ្យផុតទឹកដីខេត្តកណ្ដាលទេ បើយើងគិតតាមប្រជាសាស្ត្រ”។ លោកពន្យល់ថា “ពីព្រោះការពង្រីក ការពង្រីកក្រុង ដើម្បីឱ្យវាមានប្រសិទ្ធភាព គឺទាមទារឱ្យមានការរៀបចំរចនាសម្ព័ន្ធ និងការរៀបចំប្លង់មេត្រឹមត្រូវ”។
លោកបន្ថែមថា បើពុំមានផែនការច្បាស់លាស់ទេ ការបង្កើតក្រុងមានឈ្មោះ តែនៅក្នុងក្រុងភ្នំពេញ តែការរស់នៅវិញគឺមិនខុសពីនៅខេត្តទេ។
ជាមួយគ្នានេះ លោកឧកញ៉ាកាង សុធី អគ្គនាយកក្រុមហ៊ុនអចលនទ្រព្យLand Station ក៏បានលើកឡើងផងដែរថា ការពង្រីករាជធានីភ្នំពេញ អាចធ្វើទៅបានគឺមានតែការកាត់យកដី ខេត្តនៅជាប់រាជធានីភ្នំពេញ មកស្ថិតនៅក្រោមការគ្រប់គ្រង របស់រដ្ឋបាលរាជធានីភ្នំពេញប៉ុណ្ណោះ ។
លោកបន្តថា “នៅពេលរដ្ឋាភិបាល ពង្រីកទីក្រុងភ្នំពេញ ជាបន្តបន្ទាប់ នឹងធ្វើឱ្យសក្ដានុពលដីធ្លី នៅតំបន់ជាប់រាជធានីភ្នំពេញ ស្ទុះងើបមួយកម្រិតទៀតផងដែរ”។
ដីនៅតាមបណ្តាខេត្តជាប់រាជធានីភ្នំពេញ អាចរកទិញបានក្នុងតម្លៃមួយទាប ប៉ុន្តែនៅពេលដែលមានការពង្រីករាជធានីភ្នំពេញ តម្លៃដីធ្លីនឹងមានការកើនឡើងទ្វេដង ឬអាចច្រើនជាងនេះបន្ថែមទៀត អាស្រ័យទៅលើសក្ដានុពល នៃតំបន់ទាំងនោះ។
ជាក់ស្ដែងតម្លៃដីធ្លី នៅតំបន់ព្រលានយន្តហោះអន្តរជាតិភ្នំពេញ កាលពីមុនគេឃើញថា ក្នុងកម្រិតមួយទាប ហើយក៏មិនសូវមានអ្នកចាប់អារម្មណ៍ដែរ តែពេលដែលមានការអភិវឌ្ឍឡើង តម្លៃដីធ្លីក៏ហក់ងើបឡើងជាមុន គួរឱ្យកត់សម្គាល់ផងដែរ។
អតីតប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ថា ជានិន្នាការធម្មតា ដែលរដ្ឋាភិបាលត្រូវពង្រីកទីក្រុងបន្ថែម ព្រោះពីមុន រដ្ឋាភិបាលធ្វើយ៉ាងណាទាក់ទាញ ប្រជាពលរដ្ឋមករស់នៅទីក្រុងចាស់ (ដែនដីបច្ចុប្បន្ននៃរាជធានីភ្នំពេញ) ដើម្បីឲ្យប្រជាពលរដ្ឋមករស់នៅច្រើន ដើម្បីជំរុញសកម្មភាបសេដ្ឋកិច្ច។
លោកបន្តថា “បច្ចុប្បន្នរាជធានីភ្នំពេញ មានមនុស្សរស់នៅច្រើនហើយ ការកកស្ទះចរាចរណ៍កាន់តែអាក្រក់ ហេតុនេះរដ្ឋាភិបាលចាំបាច់ត្រូវផ្លាស់ប្តូររោងចក្រ សហគ្រាសទៅតំបន់ជាយក្រុង”។ លោកបន្តថា “ការពង្រីករាជធានីភ្នំពេញបន្ថែមទៀត ដើម្បីឆ្លើយតបនឹងការរីកចម្រើន ផ្នែកនគរូបនីយកម្មផង និងឆ្លើយតបនឹងកំនើនប្រជាពលរដ្ឋផង”។
ទោះជាយ៉ាងណាអ្នកជំនាញដទៃទៀត បានមើលឃើញផងដែរថា ការពង្រីករាជធានីជារឿងល្អប្រសើរមួយ ប៉ុន្តែរដ្ឋាភិបាលនឹងរងសម្ពាធខ្លាំងផងដែរ ដែលត្រូវវិភាជន៍ថវិកាជាតិ សាងសង់ ហេដ្ឋារចនាសម្ព័ន្ឋនានាទាំងទឹកស្អាត អគ្គិសនី និងបណ្តាញផ្លូវថ្នល់ ពិសេសបើសិនជាមិនបានរៀបចំផែនទីប្រើប្រាស់ដីបានលំអិតទេ ការអភិវឌ្ឍន៍រាជធានី នឹងមិនទទួលបានសោភ័ណភាព និងររបៀបរៀបរយ សមស្របនឹងនិន្នាការអភិវឌ្ឍន៍ទីក្រុងប្រកបដោយភាពស៊ីវិល័យនោះទេ។
ទោះជាយ៉ាងណា រហូតមកទល់ពេលនេះ ផែនការពង្រីករាជធានីបានផ្លាស់ប្តូររួចទៅហើយ បន្ទាប់ពីសម្តេចតេជោហ៊ុន សែន អតីតនាយករដ្ឋមន្រ្តីនៃកម្ពុជា បានប្រកាសបង្កើតទីក្រុងអរិយក្សត្រ និងទីក្រុងឧត្តុងម៉ែជ័យ ស្ថិតក្នុងទឹកដីខេត្តកណ្តាលដែលទីក្រុងទាំងពីរនេះ បានធ្វើឲ្យផែនទីនៃការពង្រីករាជធានីត្រួវផ្លាស់ប្តូរ ហើយនិន្នាការពង្រីកទីក្រុងនេះ ក៏បានស្ថិតក្នុងសភាពស្ងប់ស្ងាត់ ក្នុងអណត្តិរដ្ឋាភិបាលនិតិកាលទី៧ ក្រោមការដឹកនាំរបស់សម្តេចមហាបវរធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា៕
