ដោយ: គង់ លាងហួរ
អន្តរជាតិ: តម្លៃអចលនទ្រព្យនៅក្នុងប្រទេសឥណ្ឌាអាចនឹងវ៉ាដាច់បណ្តាប្រទេសនានានៅទូទាំងអាស៊ី ដោយសារកត្តានគរូបនីយកម្ម និងកំណើនសេដ្ឋកិច្ចបានធ្វើឱ្យការលក់ផ្ទះនៅក្នុងប្រទេសអាសុីខាងត្បូងមួយនេះហក់ឡើងខ្លាំង។
ប៉ុន្តែ ទន្ទឹមនឹងការរីកចម្រើននេះ អ្នកជំនាញមួយរូបនៅក្រុមហ៊ុនផ្តល់សេវាប្រឹក្សាយោបល់អចលនទ្រព្យ Knight Frank បានព្រមានថា ស្ថានភាពនេះអាចធ្វើឱ្យប្រជាជនឥណ្ឌាជាច្រើនគ្មានលទ្ធភាពទិញផ្ទះថ្មី។
លោក Liam Bailey ប្រធានផ្នែកស្រាវជ្រាវសកលនៃក្រុមហ៊ុន Knight Frank បានថ្លែងប្រាប់កាសែត Nikkei Asia ថា “ប្រសិនបើគោលនយោបាយរបស់រដ្ឋាភិបាលឥណ្ឌានឹងបន្តជំរុញកំណើនសេដ្ឋកិច្ច នោះតម្លៃអចលនទ្រព្យលំនៅដ្ឋាន និងពាណិជ្ជកម្មនៅឥណ្ឌានឹងវ៉ាដាច់បណ្តាប្រទេសអាស៊ីផ្សេងទៀត”។
-->
លោកបានបន្តថា “មូលដ្ឋានគ្រឹះនៃទីផ្សារឥណ្ឌាមានភាពវិជ្ជមាន បើគិតពីតម្រូវការអចលនទ្រព្យ កំណើនប្រជាជន នគរូបនីយកម្ម និងកំណើនសេដ្ឋកិច្ច”។
តួយ៉ាង ការលក់ផ្ទះនៅក្នុងប្រទេសឥណ្ឌាជាពិសេសនៅទីក្រុង Mumbai ទីក្រុង Bengaluru និងទីក្រុង Delhi កំពុងកើនឡើងយ៉ាងឆាប់រហ័ស ស្របតាមអត្រាកំណើននៃសេដ្ឋកិច្ចឥណ្ឌា ដែលបាននិងកំពុងកើនឡើងលើសបណ្តាប្រទេសមានសេដ្ឋកិច្ចធំៗនៅលើពិភពលោក។
យ៉ាងណាមិញ ស្របពេលដែលតម្រូវការ និងតម្លៃផ្ទះបន្តកើនឡើងយ៉ាងគំហុក ប្រជាជនឥណ្ឌាជាច្រើនបានជួបប្រទះការលំបាក ដោយសារពួកគេមិនអាចស្វែងរកលំនៅដ្ឋានតម្លៃសមរម្យបានទេ។
តួយ៉ាង តម្លៃផ្ទះនៅទីក្រុងបុមបៃ(Mumbai) ដែលជារដ្ឋធានីហិរញ្ញវត្ថុរបស់ប្រទេសឥណ្ឌា បានកើនឡើងលើសពី១០ភាគរយ ក្នុងឆ្នាំ២០២៤កន្លងទៅ។នេះបើយោងតាមក្រុមហ៊ុន Knight Frank ។
អត្រាកំណើននេះមិនត្រឹមតែមានកម្រិតខ្ពស់ជាងទីក្រុងធំៗនៅតំបន់អាស៊ីដូចជាសិង្ហបុរី បាងកក តៃប៉ិ និងសេអ៊ូលប៉ុណ្ណោះទេ។ ប៉ុន្តែ វាក៏មានកម្រិតខ្ពស់ជាងទីក្រុងធំៗរបស់សហរដ្ឋអាមេរិកដូចជា ទីក្រុង Los Angeles ទីក្រុង Miami និងទីក្រុង San Francisco ផងដែរ៕ប្រភព: Nikkei Asia៕
