ដោយ: គង់ លាងហួរ
អន្តរជាតិ: ទីផ្សារលំនៅដ្ឋាននៅទីក្រុងសៀងហៃប្រទេសចិននឹងទទួលបានការផ្គត់ផ្គង់ផ្ទះថ្មីបន្ថែមទៀតនៅឆ្នាំនេះ ដោយជំរុញឱ្យបណ្តាអ្នកអភិវឌ្ឍន៍សម្រុកលក់ចេញផ្ទះដែលនៅសេសសល់សំដៅទប់ស្កាត់មិនឱ្យមានការផ្គត់ផ្គង់លើសតម្រូវការកាន់តែខ្លាំង។
យោងតាមទីភ្នាក់ងារអចលនទ្រព្យ Baonuo បានឱ្យដឹងថា គម្រោងលំនៅដ្ឋានយ៉ាងតិចចំនួន២៧០ទីតាំង ដែលមានផ្ទះចំនួន៣០.០០០យូនីតនឹងត្រូវបានដាក់លក់នៅក្នុងទីក្រុងសៀងហៃ ដែលជាមជ្ឈមណ្ឌលពាណិជ្ជកម្ម និងហិរញ្ញវត្ថុរបស់ប្រទេសចិននៅឆ្នាំនេះ។
គិតមកទល់បច្ចុប្បន្ន ផ្ទះដែលនៅសេសសល់ ឬលក់ចេញមិនទាន់ដាច់ (Inventory) នៅក្នុងទីក្រុងសៀងហៃមានចំនួន៥៤.០០០យូនីត។នេះបើយោងតាមរបាយការណ៍ពីទីភ្នាក់ងារអចលនទ្រព្យ Baonuo។
-->
លោក Fu Liuhao អ្នកគ្រប់គ្រងជាន់ខ្ពស់នៅទីភ្នាក់ងារ Baonuo បានលើកឡើងថា “ការលើកទឹកចិត្តរបស់រដ្ឋាភិបាលចិនប្រហែលជាមិនមានប្រសិទ្ធភាពគ្រប់គ្រាន់ក្នុងការជំរុញការលក់ផ្ទះថ្មីទេ ព្រោះអ្នកទិញភាគច្រើនមានការប្រុងប្រយ័ត្នចំពោះទស្សនវិស័យរបស់ទីផ្សារ ហើយពួកគេប្រកាន់យកវិធីសាស្រ្តរង់ចាំមើលស្ថានការណ៍”។
កាលពីឆ្នាំមុន ទីក្រុងសៀងហៃបានលក់ចេញផ្ទះថ្មីចំនួន៥៧.២១៨យូនីត ធ្លាក់ចុះ២៤ភាគរយធៀបនឹងឆ្នាំ២០២៣។ នេះបើយោងតាមទិន្នន័យដែលបានចងក្រងដោយក្រុមហ៊ុនប្រឹក្សាអចលនទ្រព្យ Shanghai UWin Real Estate Information Services។
តម្លៃលំនៅដ្ឋានជាមធ្យមនៅទីក្រុងសៀងហៃបានកើនឡើង១៩ភាគរយកាលពីឆ្នាំមុនធៀបនឹងឆ្នាំ២០២៣ដល់ទំហំទឹកប្រាក់ចំនួន៧៩.១៥០យ័ន(ប្រហែល១០.៩២៦ដុល្លារអាមេរិក) ក្នុងមួយម៉ែត្រការ៉េ។
ដោយផ្អែកលើទិន្នន័យនៃការលក់ផ្ទះកាលពីឆ្នាំមុន ក្រុមអ្នកវិភាគបានព្យាករណ៍ថា អ្នកអភិវឌ្ឍន៍អាចនឹងចំណាយពេលលើសពីមួយឆ្នាំដើម្បីលក់បង្ហើយផ្ទះដែលនៅសេសសល់ក្នុងស្តុក។
យោងតាមមន្ត្រីមូលដ្ឋានចំនួន២រូប ដែលសុំមិនបញ្ចេញអត្តសញ្ញាណបានទម្លាយប្រាប់កាសែត South China Morning Post ថា “រដ្ឋបាលទីក្រុងសៀងហៃកំពុងពិចារណាដាក់ចេញនូវគោលនយោបាយថ្មីបន្ថែមទៀតដើម្បីជំរុញវិស័យអចលនទ្រព្យ បន្ទាប់ពីបានអនុវត្តន៍វិធានការជំរុញទីផ្សារជាបន្តបន្ទាប់កាលពីឆ្នាំមុន”៕ប្រភព: SCMP៕
