ដោយៈ ម៉ាណា
ភ្នំពេញៈ រាប់ចាប់តាំងពីវិស័យពាណិជ្ជកម្ម សុខាភិបាល និងទេសចរណ៍ជាដើម ទំនាក់ទំនងរវាងកម្ពុជា ម៉ាឡេស៊ីមានភាពប្រសើរឡើង បន្ទាប់ពីថៃឈ្លានពានកម្ពុជា។
ជាក់ស្តែងវិស័យសុខាភិបាលម៉ាឡេស៊ី ពង្រឹងកិច្ចសហប្រតិបត្តិការឆ្លងដែន ជាមួយកម្ពុជា តាមរយៈភាពជាដៃគូយុទ្ធសាស្ត្រជាមួយONEHEALTH KH កម្ពុជា ដើម្បីពង្រឹងប្រព័ន្ធសុខាភិបាលរបស់ប្រទេសទាំងពីរ។
កាលពីថ្ងៃទី៧ ខែកុម្ភៈ ឆ្នាំ២០២៦ ក្រុមប្រឹក្សាទេសចរណ៍សុខាភិបាលម៉ាឡេស៊ី (MHTC) បានប្រារព្ធពិធីបើកដំណើរការ Malaysia Healthcare Week Phnom Penh 2026 និងបានចុះអនុស្សរណយោគយល់ជាផ្លូវការ ជាមួក្រុមហ៊ុន OneHealth KH ក្រោមអធិបតីដ៏ខ្ពង់ខ្ពស់របស់លោកបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកកិច្ចការងារពិសេស។
ពិធីចុះអនុស្សារណយោគយល់នេះ ជាគំនិតផ្តួចផ្តើមផ្លូវការដំបូងមួយរបស់MHTC នៅកម្ពុជា សម្រាប់ឆ្នាំ២០២៦ ហើយជាផ្នែកមួយក្នុងការចាប់ផ្តើមឆ្នាំនៃទេសចរណ៍វេជ្ជសាស្ត្រម៉ាឡេស៊ី (Malaysia Year of Medical Tourism – MYMT) ដែលបានរៀបចំឡើងក្រោមប្រធានបទ “ការព្យាបាលអមជាមួយបដិសណ្ឋាកិច្ច”។
កិច្ចសហការរវាងMHTC ម៉ាឡេស៊ី និង OneHealth KH គឺជាការស្វែងរកឱកាសសហការគ្នា ពង្រឹង និងសម្របសម្រួលដំណើរការថែទាំអ្នកជំងឺ ឆ្លងដែន ដែលបង្ហាញពីការផ្តោតយុទ្ធសាស្ត្ររបស់ Malaysia Healthcare ក្នុងការធ្វើការជាមួយដៃគូរមូលដ្ឋានដែលអាចទុកចិត្តបាន ដើម្បីផ្តល់សេវាថែទាំសុខភាពឆ្លងដែនយ៉ាងរលូន និងបង្កើនបទពិសោធន៍ល្អជូនដល់អ្នកជំងឺ។
វេទិការនេះបានផ្តោតសំខាន់លើ Center of Excellence ក្នុងឯកទេសនិមួយៗ របស់មន្ទីរពេទ្យដែលទទួលស្គាល់ តាមស្តង់ដារអន្តរជាតិ និងគំរូថែទាំបែបពហុវិស័យរួមបញ្ចូលគ្នា។
ការពិភាក្សាសំខាន់ៗបានលើកឡើងថា ប្រព័ន្ធទទួលអ្នកជំងឺដែលមានរចនាសម្ព័ន្ធច្បាស់លាស់ អាចជួយបង្កើនលទ្ធផលសុខភាពអ្នកជំងឺ ដោយធានាការព្យាបាល ត្រឹមត្រូវទាន់ពេលវេលា និងលើកកម្ពស់ការផ្តល់បទពិសោធន៍ដ៏ល្អ ដល់អ្នកទទួលសេវាសុខាភិបាល។
លោក Suriaghandi Suppiah នាយកប្រតិបត្តិនៃក្រុមប្រឹក្សាទេសចរណ៍សុខាភិបាលម៉ាឡេស៊ី (MHTC) បានមានប្រសាសន៍ថា កម្ពុជាគឺជាដៃគូដ៏សំខាន់មួយសម្រាប់យើង។
យោងតាមទិន្នន័យគិតត្រឹមខែកញ្ញា ឆ្នាំ២០២៥ ចំនួនអ្នកធ្វើដំណើរ ដើម្បីទទួលសេវាសុខាភិបាល បានកើនឡើង៨១ភាគរយ ពីជាង៤៤០០នាក់ ទៅជិត៨០០០នាក់ បើប្រៀបធៀបនឹងរយៈពេលដូចគ្នាកាលពីឆ្នាំ២០២៤។ ការណ៍នេះបានបង្ហាញពីការជឿជាក់លើគុណភាពសុខាភិបាលវេជ្ជសាស្ត្ររបស់យើង។
ក្នុងកិច្ចពិភាក្សានេះ ក៏មានការពិភាក្សាផងដែរ ពីការផ្លាស់ទីអ្នកជំងឺ រួមមានការសម្របសម្រួលការធ្វើដំណើរ ការពិចារណាផ្នែកវប្បធម៌ និងការតាមដានបន្ទាប់ពីការព្យាបាល និងមុនពេលព្យាបាលដោយសហការយ៉ាងជិតស្និត ជាមួយមន្ទីរពេទ្យក្នុងស្រុក រួមមានមន្ទីរសំរាកព្យាបាលដេវ៉ាល់ដា និងក្រុមវេជ្ជបណ្ឌិតរបស់ OneHealth KH ផ្ទាល់៕
