ដោយៈ ម៉ាណា
ភ្នំពេញៈ សភាពាណិជ្ជកម្មកម្ពុជា(CCC) និងក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា នឹងរៀបចំ “កិច្ចប្រជុំកំពូលធុរកិច្ចកម្ពុជា-អាស៊ាន ឆ្នាំ២០២៦” នៅខែមីនាខាងមុខ។
កិច្ចប្រជុំកំពូលនេះ ធ្វើឡើងក្នុងគោលបំណង ដើម្បីធ្វើការផ្សព្វផ្សាយ និងបង្កើតបរិយាកាសកាន់តែល្អប្រសើរ សម្រាប់វិនិយោគិនជាតិ និងអន្តរជាតិ។
យោងតាមសេចក្តីប្រកាសព័ត៌មានរបស់CCC បានលើកឡើងថា សភាពាណិជ្ជកម្មកម្ពុជា និងក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា សហការជាមួយសភាពាណិជ្ជកម្មអន្តរជាតិ សមាគមពាណិជ្ជកម្មនៅកម្ពុជា និងអាស៊ាន នឹងរៀបចំ “កិច្ចប្រជុំកំពូលធុរកិច្ចកម្ពុជា-អាស៊ាន ឆ្នាំ២០២៦” ដែលប្រព្រឹត្តទៅពីថ្ងៃទី៣-៤ ខែមីនា ឆ្នាំ២០២៦ ក្រោមមូលបទ “ការផ្លាស់ប្តូរអាស៊ាន៖ នវានុវត្តន៍ ការធ្វើសមាហរណកម្ម និងការវិវត្តនៃឧស្សាហកម្ម”។
CCC បានបញ្ជាក់ថា “ព្រឹត្តិការណ៍នេះត្រូវបានរៀបចំឡើងស្របពេលដែលអាស៊ាន កំពុងពង្រឹងជំហររបស់ខ្លួន ជាមជ្ឈមណ្ឌលកំណើនសកល”។
ពិធីបើកកិច្ចប្រជុំកំពូលធុរកិច្ចនេះ នឹងមានការចូលរួមពីសម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា ព្រមជាមួយនឹងឥស្សរជនជាន់ខ្ពស់ ឯកអគ្គរដ្ឋទូត តំណាងស្ថាប័នពាក់ព័ន្ធ ក្រុមប្រឹក្សាពិគ្រោះយោបល់ធុរកិច្ចអាស៊ាន ក្រុមហ៊ុនអន្តរជាតិធំៗនៅកម្ពុជា និងអាស៊ាន និងអ្នកជំនាញពីគ្រប់វិស័យ។
កិច្ចពិភាក្សានៃកិច្ចប្រជុំកំពូលធុរកិច្ច នឹងផ្តោតលើសក្តានុពលអាស៊ាន និង “យុទ្ធសាស្ត្រកម្ពុជា” ដោយមានប្រធានបទសំខាន់ៗមកជជែកពិភាក្សាដូចជាៈ ១. ឧស្សាហកម្មបៃតង និងការធ្វើពិពិធកម្ម៖ “ការបង្កើនសក្តានុពលសម្រាប់របត់ថ្មី៖ ថាមពលស្អាត ការគ្រប់គ្រងដីធ្លី និងការផលិតដែលមានតម្លៃខ្ពស់”។ ២. នវានុវត្តន៍ និងប្រព័ន្ធអេកូឡូស៊ីរួមបញ្ចូលគ្នា “ការធ្វើសុខដុមនីយកម្មគយ ពន្ធដារ ឡូជីស្ទីក និងប្រព័ន្ធអេកូឡូស៊ីហិរញ្ញវត្ថុ ដើម្បីកំណើនអាជីវកម្ម”។ ៣.សមាហរណកម្មតំបន់ “កំណើនហួសពីព្រំដែន៖ ការពង្រឹងខ្សែច្រវាក់ផ្គត់ផ្គង់តំបន់ និងទេសចរណ៍” និង៤. ការវិវត្តនៃកម្លាំងពលកម្ម “ជំនាញសម្រាប់ថ្ងៃស្អែក៖ ការវិវត្តនៃវិស័យបណ្តុះបណ្តាលបច្ចេកទេស និងវិជ្ជាជីវៈ ក្នុងពិភពលោកទំនើប”។
អគ្គនាយករងសភាពាណិជ្ជកម្មកម្ពុជា លោក ម៉េង និមល បានប្រាប់ភ្នំពេញប៉ុស្តិ៍ក្នុងថ្ងៃទី១៧ ខែកុម្ភៈថា នេះជាលើកទី៣ ឆ្នាំជាប់ៗគ្នាដែលកម្ពុជារៀបចំ “កិច្ចប្រជុំកំពូលធុរកិច្ចកម្ពុជា-អាស៊ាន” ដោយលើកទី១ ក្នុងឆ្នាំ២០២៤។ ប៉ុន្តែកន្លងមកកិច្ចប្រជុំនេះកម្ពុជាក៏ធ្លាប់បានរៀបចំដែរ គឺក្នុងឆ្នាំ២០១២ និងឆ្នាំ២០២២ ពេលកម្ពុជាធ្វើជាប្រធានប្តូរវេនសមាគមអាស៊ាន។
លោកបានថ្លែងថា “កម្មវិធីនេះនឹងផ្តល់ផលវិជ្ជមានច្រើន សម្រាប់កម្ពុជា តាមរយៈការផ្តល់វេទិកាឱ្យមានជំនួបពិភាក្សា រវាងធុរជនក្នុ្ងងស្រុក និងអន្តរជាតិ”។ លោកបន្ថែមថា “យើងបានអញ្ជើញប្រទេសជាសមាជិកអាស៊ានទាំងអស់ចូលរួម។ ក្រៅពីនេះយើងក៏អញ្ជើញបណ្តាប្រទេស ដែលសភាពាណិជ្ជកម្មកម្ពុជា មានការិយល័យតំណាង ព្រមទាំងសហគមន៍អ៊ឺរ៉ុបផងដែរ”។
CCC បានឲ្យដឹងថា បច្ចុប្បន្នបណ្តាញរបស់សភាពាណិជ្ជកម្មកម្ពុជា មានការិយាល័យតំណាងចំនួន៨ នៅទូទាំងពិភពលោក រួមមាននៅប្រទេសកាណាដា ជប៉ុន អូស្ត្រាលី សហរដ្ឋអាមេរិក និងនូវែលសេឡង់៕
 និងក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា នឹងរៀបចំ “កិច្ចប្រជុំកំពូលធុរកិច្ចកម្ពុជា-អាស៊ាន ឆ្នាំ២០២៦” នៅខែមីនាខាងមុខ។){kind=link}