ដោយ: សហសេវិក
អន្តរជាតិ: រដ្ឋាភិបាលម៉ាឡេសុីបានប្រកាសផ្តល់នូវការគាំទ្រកាន់តែខ្លាំងដល់បណ្តាអ្នកអភិវឌ្ឍន៍អចលនទ្រព្យ ដែលអភិវឌ្ឍគម្រោងផ្តល់ផលចំណេញផ្នែកសង្គម និងបរិស្ថានយ៉ាងខ្លាំង និងស្របតាមអាទិភាព។
ការគាំទ្រទាំងនេះ រួមមានការពន្លឿនការអនុម័ត ការសម្របសម្រួលហេដ្ឋារចនាសម្ព័ន្ធ និងការទទួលបានសេវាហិរញ្ញប្បទានកាន់តែប្រសើរឡើង ក្រោមកំណែទម្រង់វិស័យសំណង់នាពេលខាងមុខ ដែលអនុវត្តដោយរដ្ឋាភិបាល។
លោក Mohd Shahar Abdullah អនុរដ្ឋមន្ត្រីក្រសួងសេដ្ឋកិច្ចបានអះអាងថា រដ្ឋាភិបាលនឹងធ្វើការសិក្សាអំពីកំណែទម្រង់វិស័យសំណង់ ក្រោមផែនការម៉ាឡេស៊ីលើកទី១៣ (13th Malaysia Plan) ដើម្បីពង្រឹង និងលើកកម្ពស់ឧស្សាហកម្មសំណង់របស់ប្រទេស។
លោកបានមានប្រសាសន៍ថា ការសិក្សានេះមានគោលបំណងរៀបចំរចនាសម្ព័ន្ធវិស័យនេះឡើងវិញ តាមរយៈការបង្កើតក្របខ័ណ្ឌបទប្បញ្ញត្តិ និងច្បាប់គ្រប់ជ្រុងជ្រោយមួយ ដែលគ្របដណ្តប់លើវិស័យសំណង់ ការគ្រប់គ្រងទ្រព្យសកម្ម ហេដ្ឋារចនាសម្ព័ន្ធ និងសេវាកម្មសំណង់ប្រកបដោយវិជ្ជាជីវៈ។
កំណែទម្រង់ទីផ្សារលំនៅឋាន ក្រោមផែនការម៉ាឡេស៊ីលើកទី១៣ (13MP) នឹងដោះស្រាយបញ្ហានៃភាពមិនស៊ីសង្វាក់គ្នាកាន់តែខ្លាំងឡើងរវាងការផ្គត់ផ្គង់លំនៅឋាន និងលទ្ធភាពទិញ តាមរយៈការបង្កើនផ្ទះដែលមានគុណភាព និងមានតម្លៃសមរម្យ និងកែលម្អលទ្ធភាពទទួលបានហិរញ្ញប្បទាន។
លោក Mohd Shahar បានគូសបញ្ជាក់ថា គិតត្រឹមត្រីមាសទីមួយនៃឆ្នាំ ២០២៦ ប្រទេសម៉ាឡេស៊ីមានលំនៅឋានមិនទាន់លក់ចេញ (unsold) ចំនួន ៣២.៨០១យូនីត ដែលមានតម្លៃសរុបចំនួន ១៦,៣៧ ពាន់លានរីងហ្គីត៕ប្រភព: NST online៕
