ដោយ: សហសេវិក
អន្តរជាតិ: ទិន្នន័យផ្លូវការបានបង្ហាញថា តម្លៃផ្ទះទីក្រុងធំៗរបស់ប្រទេសចិនបន្តធ្លាក់ចុះក្នុងអត្រាយឺតជាងមុននៅក្នុងខែសីហា បើធៀបនឹងរយៈពេលដូចគ្នាកាលពីឆ្នាំមុន។
យោងតាមទិន្នន័យពីការិយាល័យស្ថិតិជាតិ (NBS) ឱ្យដឹងថា នៅក្នុងទីក្រុងលំដាប់ទី១ ដូចជា ប៉េកាំង សៀងហៃ ក្វាងចូវ និងសុិនជិន តម្លៃផ្ទះថ្មីបានធ្លាក់ចុះ០,៩ភាគរយធៀបនឹងឆ្នាំមុន ដែលជាអត្រាធ្លាក់ចុះទាបជាងខែមុនចំនួន ០,២ ភាគរយ។
តម្លៃផ្ទះប្រភេទទី២ នៅក្នុងទីក្រុងទាំង៤ បានធ្លាក់ចុះ ២,៧ ភាគរយជាមធ្យមធៀបនឹងឆ្នាំមុន ដែលជាការថយចុះក្នុងអត្រាមួយទាបជាងកម្រិត ៣,៧ ភាគរយកាលពីខែកក្កដា។
ចំពោះទីក្រុងលំដាប់ទីពីរ និងទី៣ វិញ ការធ្លាក់ចុះនៃតម្លៃផ្ទះទាំងផ្ទះថ្មី និងផ្ទះប្រភេទទី២ មានសភាពថយចុះតិចជាងមុន បើធៀបនឹងខែកក្កដា។
បើគិតមូលដ្ឋានប្រចាំខែ តម្លៃផ្ទះនៅក្នុងទីក្រុងលំដាប់ទី១ បានកើនឡើងនៅក្នុងខែសីហា ខណៈដែលតម្លៃផ្ទះនៅទីក្រុងលំដាប់ទីពីរ និងទី៣ ភាគច្រើនបានកត់ត្រាអត្រានៃការធ្លាក់ចុះក្នុងកម្រិតតិចជាងមុន។
លោក Fu Linghui អ្នកនាំពាក្យការិយាល័យស្ថិតិជាតិ (NBS) បានអះអាងថា ការលក់អចលនទ្រព្យជារួមមានភាពប្រសើរ ដោយទំហំនៃការលក់ផ្ទះប្រភេទទី២ បានកើនឡើង ១០,៦ ភាគរយធៀបនឹងរយៈពេលដូចគ្នាកាលពីឆ្នាំមុន ក្នុងរយៈពេល ៨ ខែដំបូងនៃឆ្នាំនេះ៕
