ដោយ: សហសេវិក
អន្តរជាតិ: ប្រទេសអ៊ីតាលីកំពុងទទួលបានការពេញនិយមកាន់តែខ្លាំងឡើងពីសំណាក់អ្នកវិនិយោគអចលនទ្រព្យដែលមានទ្រព្យសម្បត្តិស្តុកស្តម្ភ ដោយសារគុណភាពជីវិតដ៏ល្អប្រសើរ និងប្រព័ន្ធពន្ធអត្រាថេរ (flat-tax system)។
យោងតាមបទប្បញ្ញត្តិបច្ចុប្បន្ន ជនបរទេសដែលរស់នៅក្នុងប្រទេសអ៊ីតាលី ហើយមានលក្ខណៈសម្បត្តិគ្រប់គ្រាន់ អាចបង់ពន្ធក្នុងអត្រាថេរចំនួន ៣០០,០០០ អឺរ៉ូក្នុងមួយឆ្នាំ សម្រាប់ប្រាក់ចំណូលដែលរកបាននៅក្រៅប្រទេសអ៊ីតាលី ដោយមិនគិតពីចំនួនទឹកប្រាក់ដែលពួកគេរកបាននោះទេ។
យោងតាមក្រុមហ៊ុន Knight Frank ចំនួនអ្នកប្រើប្រាស់កម្មវិធីនេះបានកើនឡើងពីប្រហែល ៣,០០០នាក់ក្នុងឆ្នាំ ២០២៤ ដល់ប្រហែល ៥,០០០នាក់នៅពេលបច្ចុប្បន្ន។
ការលក់អចលនទ្រព្យលំនៅឋានកម្រិតខ្ពស់នៅក្នុងប្រទេសអ៊ីតាលីបានកើនឡើងប្រហែល ១៤០% ក្នុងរយៈពេល ៨ខែដំបូងនៃឆ្នាំនេះ បើធៀបនឹងរយៈពេលដូចគ្នាក្នុងឆ្នាំ ២០២៥។
អ្នកទិញបច្ចុប្បន្នភាគច្រើនមានប្រភពមកពីប្រទេសអង់គ្លេស សហរដ្ឋអាមេរិក ស្វីស បារាំង ឥណ្ឌា និងហូឡង់។ ចំណាប់អារម្មណ៍ពីហុងកុង និងចិនដីគោកក៏កំពុងកើនឡើងផងដែរ។
អត្ថប្រយោជន៍ផ្នែកពន្ធជារឿងសំខាន់ ប៉ុន្តែនៅមានហេតុផលផ្សេងទៀតដូចជា របៀបរស់នៅកាន់តែប្រសើរ ការធ្វើពិពិធកម្មទ្រព្យសម្បត្តិ ការការពារទ្រព្យសម្បត្តិក្នុងរយៈពេលវែង ការទិញផ្ទះទីពីរ និងការពង្រីកការវិនិយោគលើអចលនទ្រព្យដែលមានស្រាប់នៅក្នុងប្រទេសអ៊ីតាលី។
ក្រុមហ៊ុន Knight Frank ក៏បានបញ្ជាក់ផងដែរថា ជាង ៦០% នៃការសាកសួរព័ត៌មានពីសំណាក់អ្នកទិញអន្តរជាតិអំពីអចលនទ្រព្យលំដាប់ខ្ពស់នៅប្រទេសអ៊ីតាលី ភាគច្រើនផ្អែកលើកត្តាពន្ធដារ។
អ្នកមានទ្រព្យសម្បត្តិស្តុកស្តម្ភជាច្រើនដែលមកពីក្រៅសហភាពអឺរ៉ុប ហើយផ្លាស់ប្តូរទីលំនៅទៅកាន់ប្រទេសអ៊ីតាលី ក៏ត្រូវការទិដ្ឋាការផងដែរ។ ហេតុដូច្នេះហើយ ការទិញអចលនទ្រព្យ ការផ្លាស់ប្តូរទីលំនៅ និងការវិនិយោគ តែងប្រព្រឹត្តទៅស្របពេលជាមួយគ្នា៕
