ដោយៈ ម៉ាណា
ភ្នំពេញៈ អ្នកជំនាញបានលើកឡើងថា ស្ថានភាពទីផ្សារអាជីវកម្មជួលហាង និងផ្ទះអាជីវកម្មនានាមានភាពប្រសើរនៅឆ្នាំ២០២៦នេះ។
អគ្គនាយិកាក្រុមហ៊ុន PropNex Cambodia លោកស្រីអាន សុធីតា មានប្រសាសន៍ឲ្យដឹងតាមបណ្តាញតេឡេក្រាម កាលពីថ្ងៃទី២៧ តុលាថា ទីផ្សារជួលមានភាពល្អប្រសើរ ក្នុងលក្ខខ័ណ្ឌមួយចំនួន ប៉ុន្តែសម្រាប់ចរន្តទីផ្សារដីធ្លី មិនសូវមានភាពប្រសើរទេ ហើយបើវាយតម្លៃជារួមតម្លៃដីធ្លីបានធ្លាក់ចុះជាមធ្យមចន្លោះ៣០ ទៅ៤០ភាគរយ ធៀបនឹងមុនជំងឺកូវីដ១៩មកដល់។
លោកស្រីបានបន្តថា “ស្របពេលអតិថិជនកំពុងរក្សា និងប្រុងប្រយ័ត្នលំហូរសាច់ប្រាក់ ពួកគេជួល ជាជាងចំណាយលុយធំក្នុងស្ថានភាពបែបនេះ”។ លោកស្រីបន្តថា “ចំណែកទីផ្សារដីធ្លីវិញ មិនសូវមានអ្នកបញ្ចេញលុយធំៗនោះទេ ភាគច្រើនពួកគេទិញ ឬវិនិយោគលើដីអាចបង្កើតចំណូលបាន ឬទិញសម្រាប់សាងសង់ឃ្លាំងរោងចក្រជាដើម”។
ងាកមកទីផ្សារខុនដូវិញ លោកខន គង្គាអគ្គនាយកក្រុមហ៊ុន ERA Cambodia បានលើកឡើងថា ស្ថានភាពទីផ្សារមិនសូវមានភាពល្អប្រសើរនៅឡើយទេ ស្របពេលគម្រោងដាក់ចេញក្នុងទីផ្សារមានចំនួនតិចតួចនៅឆ្នាំ២០២៦នេះ។
ចំនួនខុនដូដែលបានដាក់ចូលទីផ្សារនៅឆ្នាំ២០២៦នេះ បានកើនដល់ប្រមាណ៧០,០០០យូនីត ដែលធ្វើឲ្យការផ្គត់ផ្គង់ខុនដូ ត្រូវបានគេមើលឃើញថា មានការលើសតម្រូវការ៕
