ដោយគង់ សូរិយា
ភ្នំពេញ ៖ នៅក្នុងបទពិសផធន៍ដ៏ជូរចត់របស់លោក លោកឧកញ៉ាសៀ រិទ្ឋីធ្លាប់ត្រូវខ្មែរក្រហមបាញ់នៅតាមផ្លូវ កំឡុងពេលលោកដំនើរការក្រុមហ៊ុនដឹកជញ្ជូនរបស់លោកកាលពីដើមទសវត្សរ៍ទី៩០។
មហាសេដ្ឋីជំនួញអចលនទ្រព្យរូបនេះ បាននិងកំពុងទទួលជោគជ័យលើ វិស័យអចលនទ្រព្យ តាមរយៈគំរោងអភិវឌ្ឍន៍ខ្នាតយក្សនៅទីក្រុងភ្នំពេញ ដូចជា គំរោងThe PeAk, The Bridge, The Palmជាដើម ដែលគំរោងទាំងនោះបោះទុនវិនិយោគខ្ទង់ពាន់លានដុល្លារអាមេរិក។
លោកកញ៉ាសៀ រិទ្ឋី បានលើកឡើងពីប្រវត្តិរបស់លោកកាលពីពេលថ្មីៗនេះថា លោកបានចាប់ផ្តើមជំនួញដំបូង គឺបើកដំនើការក្រុមហ៊ុនLogistic ជាក្រុមហ៊ុន ដែលផ្តល់សេវាដឹកជញ្ជូនទំនិញពីខេត្តព្រះសីហនុ មកកាន់រាជធានីភ្នំពេញ។លោកបន្តថា កំឡុងពេលរកស៊ីក្នុងវិស័យនេះ លោកធ្លាប់បានរងការបាញ់ប្រហារជាច្រើនលើកពីពួកខ្មែរក្រហម ហើយលោកធ្លាប់លោតចុះពីលើឡាន ដើម្បី គេចពីគ្រាប់កាំភ្លើង។
ជាមួយនឹងការតស៊ូយ៉ាងស្វិតស្វាញ បានធ្វើឲ្យមុខជំនួញរបស់លោកទទួលបានជោគជ័យ ហើយរបររកស៊ីដែលធ្វើឲ្យលោកមានបានសព្វថ្ងៃនេះ គឺមានដោយសាររកស៊ីដី ទិញដីសម្រាប់លក់នៅពេលឡើងថ្លៃ។
លោកឧកញ៉ាសៀ រិទ្ឋីបានថ្លែងឲ្យដឹងពីវិធីសាស្រ្ត វិនិយោគលើដីធ្លីឲ្យបានផលចំណេញថា ទី១ ត្រូវវិនិយោគនៅតំបន់ ដែលស្ថិតក្នុងគំរោងអភិវឌ្ឍន៍របស់ រដ្ឋាភិបាល ទី២ វិនិយោគលើដីដែលមិនមានទំនាស់ និងទី៣ ត្រូវវិនិយោគលើតំបន់ ដែលមានការអភិវឌ្ឍន៍លឿននាពេលអនាគត។ ចំណុចនេះយើងត្រូវរកព៌តមានឲ្យបានជាមុន ព្រោះបើយើងទិញនៅពេលតម្លៃកើនឡើងខ្ពស់រួចទៅហើយ នឹងមិនទទួលបានផលចំណេញនោះទេ៕
