ដោយ ៖ គង់ សូរិយា
ភ្នំពេញ ៖ ក្រុមហ៊ុនអចលនទ្រព្យយក្ស មានមូលដ្ឋាននៅប្រទេសចិន Prince Real Estate Group បាន និងកំពុងត្រៀមវិនិយោគគំរោងដ៏ធំមួយទៀតនៅកណ្តាលរាជធានីភ្នំពេញ។
យោងតាមព័ត៌មានដែលក្រុមហ៊ុននេះបង្ហាញនៅលើគេហទំព័ររបស់ខ្លួនបានឲ្យដឹងនាព្រឹកថ្ងៃទី ២៣ ខែកុម្ភៈនេះថា ក្រុមហ៊ុន ព្រីនស៍ រៀល អ៊ីស្ទេត គ្រុប គ្រោងនឹងបណ្តាក់ទុនសាងសង់គម្រោងព្រីនស៍ អ៊ីនធើណាសិនណល ផ្លាហ្សា ដែលមានផ្ទៃក្រទ្បាសំណង់ សរុបជាង ២០ម៉ឺន ម៉ែត្រការ៉េ ស្ថិតលើផ្ទៃដី ២,៨ហិកតា តាមបណ្តោយមហាសហព័ន្ធរុស្សី ដែលជាគម្រោងអគារពហុមុខងារបណ្តុំនូវសេវាកម្មធុរកិច្ច អគារស្នាក់នៅ ការទិញទំនិញ និងលំហែកាយ ដែលជាមជ្ឈមណ្ឌលទីក្រុងអន្តរជាតិច្រកចេញចូលតែមួយ។
-->
ជាមួយគ្នានេះ កាលពីថ្ងៃទី ១២ ខែកុម្ភៈកន្លងមក ក្រុមហ៊ុននេះក៏បានប្រកាសសាងសង់គំរោងព្រីនស៍ ខូលីណាន បេ មានទីតាំងស្ថិតនៅចំកណ្តាលទីក្រុងព្រះសីហនុ ដែលមានផ្ទៃសំណង់សរុបជាង ១៦ម៉ឺនម៉ែត្រការ៉េ គឺជាគម្រោងអគារពហុមុខងារខ្នាតធំ តាមបណ្តោយឆ្នេរសមុទ្រ ដែលបណ្តុំទៅដោយសណ្ឋាគារលំដាប់ផ្កាយ៥ អគារស្នាក់នៅរួម អគារពាណិជ្ជកម្ម ផ្សារទំនើប អាហារដ្ឋាន និងកន្លែងសម្រាកលំហែកាយ។-ល។
លោកឧកញ៉ា ចេន ហ្សី នាយកប្រតិបត្តិក្រុមហ៊ុន Prince Real Estate Group ប្រចាំកម្ពុជាបានថ្លែងថា “កម្ពុជា និងចិនក្នុងនាមជាមិត្តល្អ និងជាដៃគូដ៏ល្អក្នុងរយៈពេលជាច្រើនឆ្នាំ កម្ពុជាបានទទួលនូវសមិទ្ធផលផ្នែកសេដ្ឋកិច្ច និងពាណិជ្ជកម្មជាច្រើនឆ្នាំមកហើយ”។
លោកបន្តថា “នៅឆ្នាំនេះស្របពេលនឹងខួបលើកទី៦០ នៃការបង្កើតទំនាក់ទំនងការទូតរវាងប្រទេសកម្ពុជានិងចិន គោលនយោបាយល្អជាច្រើន នឹងធ្វើទំនាក់ទំនងរវាងប្រទេសទាំងពីរកាន់តែប្រសើរទ្បើងមួយកំរិតទៀត”៕
