ដោយវុត្ថា
ភ្នំពេញ៖ ក្រសួងព្រះបរមរាជវាំង នៅថ្ងៃទី១៨ ខែមីនា ឆ្នាំ២០២០នេះ បានចេញសេចក្តីជូនដំណឹងស្តីពីការផ្អាកការចូលទស្សនាព្រះបរមរាជវាំង ចាប់ពីថ្ងៃ១៨មីនានេះ តទៅដើម្បីបង្កាការរីករាលដាលនៃជំងឺកូវីដ ១៩ ។
យោងតាមសេចក្តីជូនដំណឹងដែលចេញផ្សាយនៅនេះ បានឱ្យដឹងថា ក្នុងស្ថានភាពជំងឺផ្លូវដង្ហើមកូវីដ ១៩ កំពុងរីករាលដាលជាសកល នាពេលបច្ចុប្បន្ន ក្រសួងព្រះបរមរាជវំាង សូមផ្អាកការចូលទស្សនាព្រះបរមរាជវាំងចាប់ពីថ្ងៃទី ១៨ ខែមីនេះតទៅ។
សេចក្តីជូនដំណឹងដដែលបន្តថា ការបើកឱ្យដំណើរការចូលទស្សនាព្រះបរមរាជវាំងឡើងវិញ ក្រសួងព្រះបរមរាជវាំងនឹងជូនដំណឹងនៅពេលក្រោយ។
រាជរដ្ឋាភិបាលកម្ពុជា កាលពីថ្ងៃទី ១៧ ខែមីនា ម្សិលមិញនេះ បានបញ្ជាឱ្យអភិបាលរាជធានី-ខេត្ត បិទ KTV ក្លឹបកម្សាន្ត (ខារ៉ាអូខេ រង្គសាល ឌីស្កូតែក) នៅតាមមូលដ្ឋាននានា ដើម្បីទប់ស្កាត់ជំងឺកូវីដ១៩ ដើម្បីទប់ស្កាត់នឹងការរីករាលដាល នៃជំងឺកូវីដ១៩។
ការស្នើឱ្យអភិបាលរាជធានី-ខេត្តបិទ KTV ក្លឹបកម្សាន្ត (ខារ៉ាអូខេ រង្គសាល ឌីស្កូតែក) ទាំងនោះ បានធ្វើឡើងបន្ទាប់ពីមានសេចក្តីប្រកាសរបស់ក្រសួងសុខាភិបាលកម្ពុជា ដែលបញ្ជាក់ថា នៅកម្ពុជាមានការរកឃើញជំងឺកូវីដជាច្រើកករណីជាបន្តបន្ទាប់។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានឱ្យដឹងនៅក្នុងសន្និសីទកាសែតនៅព្រឹកថ្ងៃទី ១៨ ខែមីនា ឆ្នាំ ២០២០ នេះ ឱ្យដឹងថា គិតត្រឹមព្រឹកថ្ងៃទី១៨ ខែមីនា ឆ្នាំ២០២០នេះកម្ពុជាមានចំនួនអ្នកឆ្លងជំងឹ Covid-19 នេះមានចំនួន៣៥នាក់ហើយ។
លោកស្រីបន្តថា ក្រសួងសុខាភិបាល បាននឹងកំពុងតាមដានយ៉ាងយកចិត្តទុកដាក់ក្នុងការបង្កា ទប់ស្កាត់ ចំពោះការរីករាលដាល និងការព្យាបាលអ្នកដែលឆ្លងនូវជំងឺកូវីដ ១៩ នេះ ប្រកបដោយប្រុងប្រយ័ត្នខ្ពស់បំផុត៕
